Wunpawng Myu Sha Ni A Matu Kachin State Party KSP Tara Shang Hpang Sai

0
84

Kachin parti (3) galung da ai ( Kachin State Paryt- KSP) hpe upadi hku tara shang tai wa lu na matu,  2018 November shata 23 ya sha ni hta, Myen Mung Munghpawm Ra Lata komiti de matsing masat ai lam galaw sai hpe shiga na lu ai.

Lai wa sai, August (11) ya zuphpawng hte maren, Kachin parti ni gunhpawm wa lu na lam hte seng nna, KDP, KSDP hte UDPKS  ningbaw ni hku nna parti langai hku nna tai wa na matu myit hkrum let lajang sa wa ai.

KDP ningbaw Slg Aung Hkam gaw, “ Ndai zaw yaw shada let, parti langai sha tai wa sai nga jang, mung shawa ni grau kam hpa  wa na, mae bang ai shaloi mung, ayai aya n’rai mat wa na hte Wunpawng myu sha ni a matu, kam hpa ging ai parti langai byin wa nna, mung shawa n’gun ni hpe gahkyin ai masa mung re,” ngu nna tsun ai.

Gumhpawm Da ai parti  KSP hpe matsing masat galaw na hte seng nna, 2018 April shata 10 ya hta,  parti langai hpra kaw nna, marai 6 dat kasa lawm let, yawng marai 18 hpe mung shawa  a gawng malai hku nna,  shabyin shatai  hku lajang sa wa let, parti a mying hpe KSP ngu masat nna, parti a dawnghkawn hpe mung masat lu sai.

Mi n’pawt shaloi gaw Kachin parti 4 hpe gumhpawn na matu lajang da tim, KNC ( Kachin National Congress ) parti hku nna, KNC hpe dawm kau n’mai ai majaw, Kachin parti ni galung ai lam hta n’shang lawm ai hpe KNC amu madu  Slg Lang Yaw hku nna tsun ai. Parti langai hta n’mai gumhpawm lawm tim, Wunpawng myu sha ni amyu sha magam lam hta ra wa jang gaw, yawng kapyawn galaw mat na re ngu, matut nna tsun sang lang ai.

Mung masa parti lam hta, N’gun kaba ai Myen parti ni hpe shingjawng sa wa na nga jang gaw, anhte Wunpawng myu sha ni hta, n’gun kaba ai, yawng kam hpa ai hte yawng myit hkrum ai Kachin Parti langai ra nga ai hta, ya na zawn KDP parti hpe  lu lajang wa sai majaw grai kabu, n’gun lu sai.

Dai hta grau nna, mung masa lam hpe jaw ai hku shading sharai lu na matu, mung shawa ai ni yawng, KDP parti hpe n’gun jaw, madi shadaw ra na lam hpe tang madun dat ai.

REF: Shawng lam shiga, Irrawadddy

Ja Tawng Naw

LEAVE A REPLY

Please enter your comment!
Please enter your name here