Thai Raksa Chart Party Hpe Pat Kau Na Matu Thai Gawda Ai Tara Rung Kawn Dawdan

0
18

2019 ning February shata 7 ya shani hta, Thai mungdan a npawt nhpang tara hte seng ai tara rung kawn Thai Raksa Chart party hpe, mungdan a ra lata poi galaw na 2019 ning March shata 24 ya shani grai n du shi yang, pat kau na matu dawdan ai hpe chye lu ai.

Hpyen dap uphkang ai hpe n ra sharawng ai ninghkap ai hpung ni hpe, hpyen dap kawn dip kamyet n’gun jaw dat ai lam rai nga ai hpe mu mada lu nga ai.

Gawda ai tara hte nhtang shai ai, Hkawseng shayi kaba htum Ubolratana hpe hkringmang daju ra lata poi hta Thai Raksa Chart party a gawng malai hku mying tang madun ai hte seng nna, Thai ra lata poi komishin kawn February shata 13 ya shani hta, hkringmang daju usa Thaksin hte jinghku party re ai Thai Raksa Chart Party hpe pat kau na matu, gawda ai tara rung de tang shawn wa ai mabyin langai re.

Hkawseng shayi Ubolratana

Ndai zawn pat kau hkrum ai majaw, ra lata poi hta, Thaksin hpe madi shadaw ai hpung ni dang na matu grau yak ai lam byin wa sai.

Dai sha n’ga, Thai Raksa Chart Party a, amu gun hpung malawm ni hpe mung, mung masa hta shang lawm na matu 10 ning pat hkum dat sai.

Thai mungdan hpe lai wa sai 5 ning daram kawn Thai hpyen dap kaw nna, mungdan uphkang aya zing da nna Thai mugndan hpe uphkang nga ai.

REF: Aljazeera, BBC
Ja Tawng Naw

LEAVE A REPLY

Please enter your comment!
Please enter your name here