Social Media Hpe Kaja Ai Hku Jai Lang Ai Majaw, Matsan Masha Langai Wuloi Hpe Madu Lu

0
65

Shinggyim hpawng hkridun ( Social Media) hpe kaja ai hku jai lang akyu jashawn chye ai majaw, Thai mungdan a matsan masha langai mi, mying kaba akyu hkam sha lu ai hpe tang madun da tai.

Asak 34 ning re ai, Thai hkauna galaw sha ai wa, Chainat ginwang kaw nga ai Surat Paewakate gaw lai wa sai shata 2 kaw nna,  masha ni a wuloi langai hpe rem ai  amu hpe galaw ai hta,  Thong Hkam ngu ai wuloi hte gau ngwi ngwi, hku hkau mat nna,  wuloi hte shi a sumla ni hpe selfie sumla gayet nna, masha ni kabu pyaw na matu  facebook hta mara ai kaw nna, mying kaba mat wa ai.

        

Thong Hkam gaw, myit kaja ai, zen ai, shi a ntsa jawn nna hkauna de sa ai hpe grai ra sharawng ai, ngai galaw ai hku shi hkan galaw chye ai, phone hpe yu ai baw zawn re ni, phone hpe shading nna sumla gayet ai shaloi, ngai kaw jahtep sit wa ai lam ni, mani ai baw zawn ni hpe, galaw chye ai ngu Surat tsun ai.

Shi dai selfie sumla ni hpe FB hta mara ai hta masha  32,000 jan gaw jahkring na  laman share galaw hkat nna, shi hpe  matut nna mara na matu shadut ma ai.

Shingre ai aten hta, Thong Hkam a madu gaw, shi hpe dut kau na matu lajang wa sha loi,  Surat gaw grai myit npyaw ai, shi hta mari lu na atsam mung n’nga ai majaw, shinggyim hpawng hkridun FB hta  mara dat na, shi a mayak hpe tsun dan ai, Thong Hkam hpe mari na matu Thai Bat 100,000.00 ( $3000.00) daram ra ai hpe mung tsun dan dat ai shaloi, 2 ya laman hta Thai masha ni  gumhpraw Bat 136,000.00 jawm bang ya ma ai.

Surat gaw, shi myit mada da ai gumhpraw manu lu sai hte maren, alu hkap la ai hpe jahkring kau nna, Nov 22 ya shani hta wuloi madu kaw nna mare  uphkang salang ni hte rau Thong Hkam hpe   atsawm hkap la da sai.

Shi hpe garum ya ai yawng hpe chyeju dum ai ngu tsun ai, Wuloi Thong Hkam hpe myit pyaw hkra tawn da nna, shi a sumla ni hpe mung matut mara mat wa na, bai Thong Hkam kaw sa chyai mayu tim mai ai ngu, Surat hku nna  yawng hpe saw shaga tsun da nga ai.

Shinggyim Hpawng hkridun hpe atsawm kaja ai hku, jai lang chye jang gaw, tinang  a matu hpaji jat ai hte, akyu rawng ai lam ni law law nga ai hpe tang madun da tai.

REF: BBC News

Ja Tawng Naw

LEAVE A REPLY

Please enter your comment!
Please enter your name here