Sinna Yerusalem Hpe Israel A Muklum Masat Ai Hpe Australia Myithkrum

0
77

2018 December shata 14 hta, Australia hkringmang daju Scott Morrison gaw Sinna Yerusalem mare hpe Israel mungdan a muklum hku nna masat masa di ya ai lam hpe chye lu ai. Rai timung, Israel hte Palestine mungdan lapran hta ngang grin ai simsa lam lu jang she Australia sumtsan salang rung hpe Yerusalem mare hta htawt sit na lam hpe tsun ai.

Scott Morrsion

Ndai laman, sut hpaga lam htinglet rung hte, Shimlam magawp maga rung ni hpe shawng hpaw lajang mat wa na. Sumtsan salang rung hpaw na matu htap htuk ai shara hpe tam mat wa na re. Mungdan lahkawng a kanawm mazum ai lam gaw, UN a Mungkan Wunpawng hpung shimlam kongsi a dawdan ai lam ni hte maren hkan nang mat wa na lam hpe, Morrison hku nna tsun ai.

USA mungdan a sumtsan salang rung hpe, Tel Aviv kawn Yerusalem de htawt sit ngut ai hpang, Australia Asuay hku nna ndai zawn hkan galaw ai gaw, mung masa grau dan dawng hkra galaw ai lam, re ai hpe, Australia mungdan masha ni dinglun nga ai.

Lai wa sai, October shata hta galaw ai ra lata poi hta, Jew masha ni grau law nga ai, Sydney muklum hta mae dang na matu yaw shada let galaw ai masa hpe, sawk sagawn ai salang ni tang madun ma ai.

Ndai hte seng nna, Palestine mundan gaw, Australia mungdan a galaw shapraw ai gunrai ni hpe pat hkum na matu, Muslim mungdan ni hpe tsun garum hpyi nga ai.

REF: The Guardian
Ja Tawng Naw

LEAVE A REPLY

Please enter your comment!
Please enter your name here