Si-tawng Mare Hta Rahkaing Myu Sha Marai 5 Hpe Myen Hpyen Dap Ni Dingsang Gap Sat

0
34

2019 ning March shata praw 21 ya shana hkying 8 daram ten, Rahkaing mung daw Buthitawng ninghtawn Si-tawng mare hta sinat gap hkat ai lam byin ai hta, mare masha marai 5 si nna, 20 jan hkala hkrum ai hte mare masha 400 jan hprawng yen mat ai lam chye lu ai.

“ Majan gasat hkat ai nre, Myen hpyen la ni gap ai, lak nak kaba hte gap ai, sinat kaji hte mung gap ai,  kaduk nhkun kata de sinat hte gap bun ai, mare masha marai 5 si hkala hkurm ai, num 2, la 3 re, kaduk nhkun hta marai (4) si ai hta,  kahpu kanau 2, madu wa/jan yan la 2 si sai, mare sinna maga de na dum n’ta hta yup nga ai Mg Ba Nyut a kanu ( 80 ning daram) hpaw mi  mung si hkrum mat sai, hkala hkrum ai mare masha ni gaw marai 20 daram nga ai, anhte a dum nta ni mung hten mat ai,” ngu Si-tawng mare a myu shayi langai tsun wa sai.

Si-tawng mare masha Ko Han Htay mung, “ mana hkying 8 daram ten hta, hpyen la ni mare hpe wang tawn da ai,  dai ngut ai hpang,  mare kata kaw bawm langai hkrat wa sai, ngai mung hkrit nna nta kata kaw makoi rawng nga ai, Myen hpyen la ni mare kata hte dingsang gap bang wa sai,” ngu tsun wa sai.

Dai lam hte seng nna,  rapdaw amat U Awng Thawng hku nna, “ Anhte Si-tawng majan shiga na ai majaw sa yu ai,  lahkawng maga gap hkat ai hku nre, hpyen dap hku nna mare hpe jawm gap nga ai, anhte ni du ai shaloi ten du hkra naw gap nga ai,  anhte hpe mu jang she gap ai lam jahkring nna yen mat ai,” ngu nna tsun wa sai.

Gap hkat ai lam hte seng nna, Myen hpyen dap shiga shana shabra hpung a Du up daju Zaw Min Tun gaw, “  Mana hkying 9 daram hta, gasat gala ai lam byin ai, Si-tawng mare hte ni ai, dai kaw AA hte gap hkat ai, AA n’gun tsa lam daram nga ai, shana hkying 11 daram du hkra gap hkat ai,” ngu tsun wa sai.

 Si-tawng mare na majan gasat ai hte seng nna, AA rawt malan hpung a tsun shaga ahkang lu ai, Kahing Thu Hka gaw, “ Dai aten hta majan gasat ai lam n’nga ai,  Myen hpyen dap kawn mare masha ni hpe dingsang gap ai hku re, mare kata shang nna gap sat ai lam rai sai, grai nkaja dik ai majan ru hka amu hte seng ai lam rai wa sai, “ ngu tsun shaga wa sai.

Myen hpyen dap hku nna March shata 16 hte 18 ya shani hta mung Myauk-u mare hpe gap ai majaw, mare masha 10 daram hkala hkrum wa sai.

Myen ni a zai ladat gaw, AA ni gap ai lam n nga tim, AA hpe madi shadaw nga ai, mare ni hte mare masha ni hpe dingsang shanhte shawng  gap nna,  majan gasat hkat ai zawn galaw nna, mare hpe daingsang gap bun ai ladat hpe lang nga ai hpe mu lu nga ai, grau nna, AA hpe madi shadaw n’gwi hkra galaw nga ai  hpe  adang  aleng mu lu nga ai, raitimung, Rahkaing amyu sha malawng maga gaw, AA hpe madi shadaw ai lam hta yawm mat wa ai n re ai sha, grau jat wa ai, nang wa ai hpe mu lu nga ai.

REF: VOA, Irrawaddy News
Ja Tawng Naw

LEAVE A REPLY

Please enter your comment!
Please enter your name here