Shiga Sanglang Hpawng Hta Gwi Gwi Masu Ai Myen Hpyen Dap

0
67

2019 ning May shata praw 3 ya shani hta Nay-pyi-daw hpyen labau mazing madun htingnu hta, Myen hpyen dap jaw ai shiga htinglet komiti hpa awn Du kaba Soe Naing Oo hku n’na simsa lam hte seng ai hte, Rahkaing gasat gala ai lam hte seng nna shiga sanglang hpawng hpe galaw wa ai hta, Rahkaing mungdaw Kyauk-tan mare masha 6 gap sat ai hte seng nna, shi laika sara ni a man hta n jaw ai hpe gwi gwi masu nna tsun ai hpe chye lu ai.

Myen Du hku nna tsun wa ai shaloi, Kyauk-tan mare hta mare masha 275 hpe san jep na matu rim da ai hta, May praw 2 ya manap hkying 2 daram hta masha nkau mi gaw laknak gashun na matu shakut wa ai majaw, gap shazim ai lam galaw wa sai, dai hta marai 6 si nna, 8 hkala hkrum ai, marai 4 mat nga ai, ndai laman nkau hpe bai dat ya sai, 126 hpe matut nna san jep nga ai hpe tsun sanglang wa sai.

Maga mi hku nna, hkala hkrum ai mare masha U Maung Than Soe hku nna, “ rim da hkrum ai ni hta, myit n hkam kaja ai masha langai lawm ai hpe seng ang ai ni hpe tsun dan sai, raitim hpyen la ni hku nna, dai wa kaja ai manya masu nga ai ngu sha bai tsun ai. Dai manya wa gaw shani tup abrawp nga ai, May praw 2 ya jahpawt hta, manya hku n’na, kagat u, kagat u ngu bai abrawp tsun wa ai hta, hpyen dap hku nna dai wa hpe n gap ai sha, masha hpawng na nga ai maga de gap ai majaw, yup taw ai kaw nna mung machyu pala hkra nna si hkala hkrum ai ni nga ai, shanhte ni minutes 20 daram na hkra gap ai. “ ngu tsun wa sai.

Dai mabyin hte seng nna hpyen dap tsun ai hte, ta tut hkala hkrum ai ni tsun shaga ai shai nga ai majaw, lak san komishin hpaw nna san sagawn ra ai ngu Rahkaing amat ni kawn tsun nga ai hpe chye lu ai.

Myen hpyen dap gaw, amyu bawsang ni a shara hta, shinggyim ahkaw ahkang tawt lai nna mare masha ni hpe roi rip sat nat ai lam galaw ai hpe, galoi yin la ai lam n nga ai, mung kan hpe masu na tsun shaga nga ai rai tim, UN hku nna hpyen dap ni tawt lai da ai lam ni hpe matsing ningting la n’na, tara dara na lajang nga ai hpe chye lu ai.

REF: RFA, VOA
Ja Tawng Naw

LEAVE A REPLY

Please enter your comment!
Please enter your name here