Share Shagan Ai Saudi Ramma Shayi Sha Hpe Canada Hkringmang Hkaptau

0
66

Saudi Arabia mungdan na Asak 18 ning ramma shayi sha Rahaf Alqunun gaw, dinghku kata hta, zingri zingrat lam ni hkrum nna, mungdan kata na hprawng yen wa ai hta Thai mungdan kaw du nga ai shaloi, Canada mungdan ni shingbyin na matu ahkaw ahkang jaw ai majaw, 2019 ning January shata praw 11 ya shani hta Canada mungdan Toronto mare de du sai lam hpe chye lu ai.

Rahaf Alqunun gaw, shi a mungdan Saudi Arabai hta nga ai shaloi, myu shayi sha ni hpe dip ka-up da ai lam ni law law kaw nna, shi hku nna hkrum sha lai ai wa lam ni gaw, kara zen ai majaw, n’ta kata kata hta shata 4 – 5 sharawng da hkrum ai, Isalam nawku htung kaw nna pru mat wa ai majaw, shi a asak shim lam hpe jahkrit shama ai lam ni hkrum nga ai hku re.

Shi mungdan kata hta hkrum sha ai lam ni hte seng nna, Thai mundane du ai shaloi shiga dap ni hpe tsun ai hta, “ hkum hkrang sha n’ga, myit masin du hkra zing ri zingrat hkrum ai lam ni nga ai, lam shagu hta myu shayi ni hpe dip ka-up da ai lam ni nga ai, ngai na asak shim lam hkrit tsang ra ai de du wa ai majaw mungdan kaw nna hprawng ra mat ai.” Dai sha n’ga “ jawng lung mayu ai, amu galaw mayu ai” ngu Alqunun hku nna matut tsun ai.

Alqunun hte n’ta masha ni, Saudi Arabia mungdan kaw nna, Kuwait mungdan de hkawm chyai nga ai ten hta, shi hku nna, Australia visa lu hkra la nna Thai mungdan de n’bungli hte hprawg yen wa sai. Shi hprawng yen ai hpe n’ta masha ni chye ai hte, hkan sagawn ai, Saudi Arabia mungdan hku nna Thai mungdan de shana nna, shi a passport laika buk hpe zing da sai. Dai shaloi, Alqunun hku nna, n’bungli pa hta nga ai, manam jarawp na gawk kata kaw sha chying hka la nna rawng mat ai.

Dai shaloi shi hku nna, shi a mayak hpe, lamu ganghkau shawa matut mahkai ai ladat ( Social Media ) Instagram hta shana ai lam hpe galaw ai, UNHCR ni lawan garum na hpe tsun ai hta, mungkan masha law law chye wa nna shi hpe jawm garum na matu shadut ai lam ni galaw wa sai. Dai shaloi Thai Asuya a masha htawt shang jep jen dap ni hku nna shi hpe Saudi Arabia mungdan de bai wa sa na matu hkyen wa sai. Rai timung, UNHCR hku nna lapran shang nna jahkrum ya ai majaw, Thai mungdan hta tsinyam langai hku jahkring mi nga lu sai, dai shaloi aten hta Canada mungdan gaw shi hpe mungdan hta shingbyin nga na hkap la ai majaw, Canada mungdan de January shata praw 11 ya shani hta du shang wa sai.

Canada mungdan Asuya a Masha htawt shang jep jen dap hkringmang hku nna Alqunun Canada nbungli hpa hta du wa ai shaloi, “ Magrau grang ai Canada mungdan masha ningnan” hpe hkap tau la ai ngu tsun nna hkalum la ai hpe chye lu ai.

( shi hku nna, lamu ganghkau shawa matut mahkai ai ladat hpe akyu rawng ai hku jai lang ai majaw, jahtum hta awngdang ai lam lu la mat ai)

REF: Aljazeera
Ja Tawng Naw

LEAVE A REPLY

Please enter your comment!
Please enter your name here