Sam Rawt Malan Hpung Shada Gap Hkat Ai Majaw, Mare Masha Ni Si Hkala Byin

2018 ning November  shata 23 ya jahpawt 06:20 daram hta,  Dingda Sammung Hsipaw mare dingda maga, Nalawt mare hta Sam rawt  malan hpung  RCSS/SSA  hte SSPP/SSA shada gap hkat ai majaw, mare masha 3 si nna, marai 3 hkala sawng ai shiga na lu ai.  SSPP/SSA maga de gaw TNLA Balawng rawt malan hpung ni lawm nna, RCSS maga de gaw, kalang lang Myen hpye dap ni garaum lawm ai lam hpe mung chye lu nga ai.

Si mat ai wa hte jinghku daw ai wa tsun ai gaw, “ asak 10 ning re ai Sai Un hte asak 30 daram re ai, Sai Pe yang aw machyu pala hkra nna kalang lata si mat sai.  Nan Aye Mon( 20 ning), Sai San Naung ( 30 ning jan),  Jawng Sara num Nan Htwi ( 30 jan ) gaw hkala hkra ma ai. Ndai majan gaw Sam rawt malan hpyen hpung lahkawng yan shada byin taw ai, ndai hku sha matut sa mat wa na kun, anhte mare masha ni gaw nchye na mat sai, shanhte shada gap hkap nna, si ai kun hkala ai kun hpe pyi nchye mayu sai, ya gaw, ma ni hte mare masha ni si hkala jam jau hkrum sha ra nga sai,” ngu tsun ai.

Hkala sawng ai ni hpe Mung Hkae mung shawa tsi rung de woi sa nga ai shaloi, Sai San Naung bai si mat ai.

Lahkawng maga gaw mare hta minutes 5 daram gap hkat ngut ai hpang, hpung mi gaw, mare  shinggan maga, lam kaba a sinna maga de yen mat wa nna, wuhpung langai gaw  mare  hta naw nga ai taw ai hpe matut tsun dan ai.

Dingdung Sammung, Hsipaw, Lashio, Namdu ninghtawn maga de ndai laman majan ni matut manoi byin nga ai majaw, mare masha ni gaw yi tsun hkauna atsawm nmai galaw nna, hpyen yen ra mat ai majaw,  du wa na shaning na malu masha hte seng nna myit tsang nga ma ai hpe, hpyen yen ni hku nna tsun nga ai.

 

REF: Shannews

Ja Tawng Naw

Leave a Reply

Your email address will not be published. Required fields are marked *