Sam Rawt Malan Hpung RCSS Hte SSPP Shada Gaphkat Jahkring Ai Lam Myit hkrum Sai

0
18

2019 Ning May shata praw 11 ya kawn Sam amyu sha rawt malan hpung rai nga ai, ( SSPP / SSA ) hte ( RCSS / SSA ) ni hku nna shada gasat hkat nga ai lam hpe jahkring na matu myit hkrum ai lam lu la sai hpe, ndau laika shapraw ai hpe chye lu ai.

“ Laknak lang hpung lahkawng lapran hta gasat hkat ai lam a majaw, buga mare masha ni hpe hkra machyi shangun ai lam ni byin n’na, dum n’ta kawn hprawng yen ra ai majaw, buga mare masha ni hte Sam bunggyi ni hku n’na gap hkat jahkring na matu, hpyi shawn wa ai majaw, lahkawng maga bawngban jahkrum nna, gaphkat jahkring ai hpe myit hkrum wa sai,” ngu SSPP/ SSA Dujum up Sai Su kawn tsun wa sai.

SSPP hte RCSS ni hku n’na, lai wa sai bat lahkawng lapran kaw n’na shada gap hkat jahkring na matu bawngban hpawng galaw wa n’na, lahkawng maga myit hkrum ai hte maren, hpyen dap shagu de du hkra matsun da sai lam hpe, n’dau laika hta mu lu ai.

Dingdung Sam mung hta 2018 ning htum wa maga kaw nna, SSPP hte RCSS ni lapran hta majan byin ai lam ni grau law wa ai majaw, Thibaw, Kyaw-me, Namtu, Kyae-thi, Maing-kai mare kawn buga mare masha hkying lam hku nna, tinang mare buga kaw n’na hprawng yen ra mat sai.

Ndai zawn Sam Rawt malan hpung shada gaphkat jahkring ai hpe galaw ngut ai hpang, laga amyu bawsang ni hte ma, Myen hpyen dap hte ma gaphkat jahkring ai lam ni hpe matut n’na galaw mat na hpe Dujum up Sai Su kawn tsun wa ai hpe chye lu ai.

REF: BBC, SSPP
Ja Tawng Naw

LEAVE A REPLY

Please enter your comment!
Please enter your name here