Sadi Maja Let Hkaptau Ra Sa Na Shaning 2019

0
88

2018 ning hpe bai nhtang yu jang, Wunpanwg myu sha ni a mung masa, Simsa lam masa hte IDPs masa yawng gaw myit dik hpa nre ai hpe mu lu nga ai. Dai hte maren sha du wa na 2019 ning hpe maram yu jang mung tsang hpa sadi maja nna byin wa mai ai lam ni hpe tang madun dat ai

Simsa Lam Masa
Myen hpyen dap ni shata 4 gap hkat jahkring nna, simsa lam hte seng ai hpe, wuhpung langai hpra bawng ban mat na ngu ai lam gaw, kalang mi bai FPNCC hpe UNFC hten run mat wa hkra galaw ai ladat langai ngu nna mung mai tusn nga ai. FPNCC ni a masa gaw simsa lam hte seng nna wuhpung yawng jawm hpawm nna shaga na nga tim, Myen gaw garan nna sha galaw mayu ai masa sha sa re, ya mung hpyen man ginra 5 hpe gaphkat jahkring da nna, Rahking AA ni hpe majan kaba baw nna shamyit nga ai. Dai majaw, n’bung ai masa lam lahkawng hta kadai wa mahtang garau lu gasup na hpe yu ra sai. FPNCC ni mahtang grau myithkurm let ja ja tsap lu na i shing nrai, Myen ni mahtang hpung n’kau mi hpe masu hkalem nna garan shapraw mat wa na I ngu ai hpe gaw, yu ra nga sai. Teng sha mai tsun ai gaw, NCA ladat hte sa taw ai simsa lam bawng ban ai ladat gaw amu nbyin nga ai hpe mu lu nga sai. Dai hpe asak bai jahkrung na matu gaw, KNU hte RCSS ni njin wa tim, FPNCC malawm ni hte galaw wa na ngu ai masa hpe mu lu nga ai.

Mali Hka Hka Madim Masa
2018 ning Dec 29 ya hta Miwa sumtsan dat kasa Mr. Hong Liang hte KBC ningbaw ningla ni, Kachin mung masa party ni hte san san hkrum shaga nna Mali hka madim hte seng nna tsun shaga ai hpe chye lu ai. Dai lam ni gaw,
● Mali Hka madin galaw na hpe myithkrum jang laga Miwa Labau kaba ni, company ni hku nna Myen mung sut hpaga lam arang bang wa jang Myen mung hte Jinghpaw mung hkan akyu rawng wa na
● Miwa mung shawa ni mung Mali hka madin hte seng nna pawt ai lam ni byin tim, jinghku masa hku ahkyak tawn da nna, hkam sharang let la nga ai
● Kachin Party hte, Kachin mung shawa ni ninghkap ai lam n’galaw ai sha madi shadaw sa wa na.
● Mali hka madin jahkring na lam hta, KBC gaw tara shang Myen mung hpaji jaw Awng San Suu Kyi hpe ninghkap laika sa da ai hpe, dai ni na galai shai wa ai masa ni hte maren bai dawm ya na lam ni, lawm ai hpe chye lu ai.
Mali hka madin gaw Wunpawng myu sha ni kawn ninghkap hpang let, Myen mung masha ni du hkra lawm wa ai majaw, jahkring mi gan jahkring da ai. Rai timung Miwa Asuya a ladat gaw, dai hpe lu hkra galaw na ngu ai masing sha nga ai, dai hte seng nna, Myen mung hpaji jaw Awng San Suu Kyi hku nna, n’galaw an ngu ai hpe adan aleng tsun shaga da ai lam ni grai n’nga shi ai. Dai majaw, Mali hka madin hte seng nna gaw Wunpawng myu sha ni hta hkrum wa mai ai mayak kaba byin wa hkyen nga ai hpe tang madun dat ai.

REF: Shawng Lam Shi Sawk
Ja Tawng Naw

LEAVE A REPLY

Please enter your comment!
Please enter your name here