Russia Hpyen Hpe Ninghkap Na Matu Ukraine Mungdan  hta Hpyen Uphkang Aming Shapraw

Panglai Chyang hta,  Ukraine Hka dap sanghpaw 3 hte magam gun ni yawng hpe rim kau ngut ai hpang, Ukraine mungdan, shara n’kau mi hta, Gumsan magam Petro Poroshenko hku nna,  hpyen uphkang tara hte, shana pru hkawm sa ai lam hpe pat hkum ai aming hpe mungbawng rapdaw kaw nna shagrin ya sai hpe chye lu ai.

Russia hte Ukraine ni 2014 manghkang byin ngut ai hpang, shana n’mai pru hkawm sa lu ai lam gaw, kalang mi n’nan bai byin hpan sai.

Russai Ni Hpa Rai N’na Galaw Ai

2018 Nov 18 ya shani, Russia ni madu ai hka panglai shara de Ukraine hka hpyen dap sanghpaw 3 tawt lai shang wa ai lam hpe mara shagun nna, Panglai chyang kaw nga ai Ukraine hka sanghpaw 2 hpe gap kau nna, laga sanghpaw langai hpe gaw, Russia Hka dap sanghpaw hte adawt ai lam hpe  galaw wa sai.

Shada Mara Shagun Hkat

Ndai mang hkang a majaw, Ukraine hka dap hpyen la marai 6 hkala hkra mat nna, Russia ni hku nna dasang mara tam ai lam hpe Ukraine Asuya a Salang kaba ni mara shagun da sai.

Dai hte maren, Russia shinlam dap FSB kaw nna gaw, Ukraine ni mahtang shang ginjang galaw ai ngu  mara shagun da nga ai.

Hpyen  Uphkang tara shapraw ai yaw shada lam

Ndai zawn Russia ni gau ngwi ngwi   shang ginjang galaw wa ai lam hte, mara tam manghkang shabyin ai lam ni hpe, makawp maga na matu hte, Ukraine mungdan a makawp maga ai ladat grau kaja wa na matu re ai lam hpe, Ukraine gumsan magam Poroshenko hku nna tsun ai.

Laban jahpawt hta, USA mungdan a UN hte seng ai hkringmang dat kasa Nikki Haley gaw, Russia ni ndai hku galaw ai gaw,  Ukraine mungdan a awmdawm daru ahkang hpe dingsang di ai lam  re ai hpe, tsun da nga ai.

REF: VOA News

Ja Tawng Naw

Leave a Reply

Your email address will not be published. Required fields are marked *