Rahking Gasat Gala Ai Hte Seng N’na NRPC Hta AA Tsun Shaga

0
66

2019 ning March shata 21 ya shani, Naypyidaw hta NRPC hte NCA hta ta masat grai n’htu shi ai, rawt malan hpung 8 hte hkrum shaga bawngban ai hpe chye lu ai.

Zuphpawng hta, Rahkaing majan gasat gala ai manghkang hte seng nna, NRPC ningtau ningbaw Dr. Tin Myo Win hte AA rawt malan hpung a Amu Madu 1, Du kaba Kyaw Han ni hku nna n bung ai ningmu hte tsun shaga ai hpe chye lu ai.

Dr. Tin Myo Win gaw, “ Wuhpung wuhpawng ni shara jahkrat nna shakut wa ai gaw, shim lam hte simsa lam hpe jahkrit nga ai,” ngu tsun wa sai.

Dai sha n’ga “Shaning 70 ning jan na sai gasat gala ai hpe sharin la nna, ya Rahkaing mung shawa ni hku nna laknak lang nna ahkaw ahkang ni hpyi nga na malai, mung masa bawng ban ai de shang lawm na matu saw shaga mayu ai ngu,” matut tsun shaga wa sai.

AA rawt malan hpung a Du kaba Kyaw Han gaw, “ Rahking mung hpe Rahkaing rawt malan hpung sha shim lam, simsa lam hte bawng ring lam ni hpe lit la mai ai hpe, hkam la da nna, myit lai kaja ai hte hkrum shaga ai lam ni galaw jang, gasat gala ai lam ni yawm mat na re,” ngu tsun wa sai.

“ Anhte AA rawt malan hpung hpe Rahkaing mung hta nga na hpe Myen hpyen dap hku nna n’ra sharawng ai hpe chye ai, raitimung anhte Rahkaing amyu sha ni a matu Rahkaing mung hta, Rahking hpyen dap nga lu na matu gaw anhte ULA a madung yaw shada ai lam langai re, Rahkaing mung shawa hpe Rahkaing hpyen dap sha simsa, shimlum, bawngring galu kaba wa na matu lit la mai ai ngu hkam la da ai majaw, anhte ni galaw ging ai hpe galaw nga ai, ya mung anhte ni Rhkaing mung hpe lit la hpang nga sai,” ngu matut tsun wa sai.

Dai lam hte seng nna, Gumsan magam rung a hpa-awn matsun Du U Zaw Htay hku nna gaw, AA hte seng nna hkrumzup bawngban na matu lam hpaw da ai hte, Rahkaing mungdaw simsa lu na matu, Asuya hku nna galaw ging ai lam ni hpe galaw nga ai ngu tsun wa sai.

NRPC hku nna gaw, rawt malan hpung langai hpra hku hkrum shaga mayu tim, FPNCC ni hku nna wuhpung kaba hte shaga na matu dawdan da ai majaw, dai ni na zuphpawng hta, wuphpawng yawng hte hkrum shaga wa sai.

March shata 22 ya hta gaw, Myen hpyen dap dat kasa ni hte FPNCC wuhpung ni matut hkrum shaga mat na hpe chye lu ai.

REF: RFA, Shawng Lam Shi Sawk
Ja Tawng Naw

LEAVE A REPLY

Please enter your comment!
Please enter your name here