2019 Ning March shata 27 hte 28 ya lapran hta Rahkaing hte Sammung hta byin ai gasat gala ai lam hpe tang madun dat ai.
1) Rahkaing gasat ai lam hta Myen dap hka-la-ya 270 dap hkrang hten mat
● 2019 ning March shata 27 ya shani hta, Myawk-u ninghtawn Lin-mwi-tawng hta shara la da ai, Myen hpyen dap hka-la-ya (270) hpe AA gasat langa commando hpung ni manap 6:40 am ten daram hta maja shang htim gasat ai majaw, hka-la-ya (270) dap hkrang hten mat ai hpe chye lu ai.
Gasat gala byin ai hta, Asuya Myen dap kawn hpyen la ni tsawmra si hkala hkurm wa sai. AA ni bai htingnut ngut ai hpang, 9:20 AM daram ten hta, Myen hpyen helicopter lahkawng hte AA ni a htingnut ai maga de hkan gap ai shiga hpe chye lu ai.
● 2019 ning March shata 28 ya jahpawt 6:30 AM daram ten hta, Rahkaing mungdaw Ya-thae-tawng ninghtawn Pae-thadu mare mayan hta Myen hpyen dap hte AA rawt malan hpung ni laja lana gasat nga ai lam shiga na lu ai.
● Rahkaing mungdaw dingdung maga de majan laja nga ai ten hta, AA dap awn daju Du daju Tun Myat Naing hku nna, gasat gala ai lam hpe Rahkaing mung ting chyam bra nna gasat mat na hpe ndau tsun shana ai hpe chye lu ai.
2) Dingdung Sammung Namtu Ninghtawn Hta Gasat gala byin
● 2019 Ning March shata 27 ya jahpawt hta, dingdung Samung Namtu Ninghtawn, Maimu mare grupyin hta Myen hpyen dap hte, FPNCC hpung hta lawm ai TNLA & SSPP ni gasat gala byin ai lam byin ai. Myen hpyen dap kawn laknak kaba hte gap bun ai majaw, mare masha ni a dum n’ta lahkawng wan hkru mat wa sai.
27 ya jahpawt hkying 10 AM daram ten hta, Sanhka mare grupyin hta shara la nga ai rawt malan pawng hpawm hpung hpe Myen hpyen dap kawn, n’bung li hte wa gap ai zaw, Namtu hta machyu nga ai hpyendan kaw nna mung laknak kaba ni hte matut manoi gap ai hpe chye lu ai.
Gasat gala byin ai majaw, Maimu, Kaung hung hte Lung meik mare na mung shawa 200 jan Mansan mare de hprawng yen nga ai hpe chye lu ai.
REF: Shawng Lam shi sawk, RFA
Ja Tawng Naw
