Num Hking Sa Ten, Laksan Ginsum Kata Rawng Nga Ai Dinghku Num Hte Kasha Ni Nepal Hta Si

0
19

2019 ning January shata 10 ya shani hta, grai katsi dik ai n’shung ta hta, amyu shayi ni num hking sa jang, jahkring gan nga ai ginsum kata hta Nepal dinghku num langai hte ma lahkawng nsa sa chyat nna si ai lam chye lu ai.
Nshung ta katsi dik ai ten hta, ginsum lum lu na matu, wan htung lajang da ai kaw nna, wan hkut mawng majaw yup pyaw taw nga ai kanu hte asak 12 hte 8 ning re ai ma yan lahkawng nsa sa chyat nna si mat ai.

Hking sa ai shaloi, num ni hpe n’ta shinggan de shale da ai htung lailen hpe Nepal Asuya hku nna 2017 ning kawn jahkring da ai rai tim, myo hte san ai mare buga ni hta, dai lailen hpe matut nna naw hkan sa nga ma ai.

Ndai zawn garan ginhka nna ginsum hta wa nga ra ai majaw, wanhkut mawng nna si ai lam hte, lapu achye hkrum nna si hkrum ai lam ni byin lai ga sai.

Hindu nawku htung makam masham hta, num hking sa ai ten hte, ma shangai ngut ai ten hta num ni gaw awu asin byin ai, gam n’kaja ngu ai makam a majaw, num ni hpe laksan ginsum hte nga wulawng hkan sa nga shanun ma ai.

Hking sa ai ten hta, num ni hku nna, la ni hte dumsu ni hpe n’mai hkra ai, n’kau malu masha ni hpe pa n’mai sha ai, nam dum du hkra nmai lang ai, dinghku kata jasan jaseng ai lam ni nmai galaw ai, mare hte san ai shara kaw sha tinang hkum hpe san seng ai lam mai galaw ai, lam ni hpe masat da nga ai.

Nepal mungdan a masat da ai tara masa hku nga jang, hking sa ai ten hta n’ta shinggan de pru shangun ai wa hpe htawng dam shata 3 hte US$ 27 jaw na hku masat da ai. Dai tara hpe grau nna tang du wa na matu amyu shayi ahkang aya sharawt hpung ni hku nna, hpyi shawn nga ai hpe chye lu ai.

REF: BBC, NDTV
Ja Tawng Naw

LEAVE A REPLY

Please enter your comment!
Please enter your name here