NCA Lam Hta Gang Hkring Na KNU Ndau !!!!

0
33

(6) lang na KNU a ra ahkyak Dinggrin zuphpawng hpe Nov 6 – 10 ya laman galaw ngut sai, zuhpawng  a madung hku nna gaw, NCA hte seng nna tara shang zuphawng ni hta shang lawm ai lam grai n’galaw shi ai sha, Simsa lam hte seng nna , laksan Asuya hte jahkrum mahtai tam nna galaw sa mat na hpe daw dan da ai lam chye lu ai. Zuphawng kaw n’na ahkyak ai lam ni gaw:

NCA Masa hta Shanut ai lam ni byin wa ai
■ Ya NCA hta shanglawm taw nga ai, Stakeholder wuhpung wuhpawng ni hku nna, NCA masa lam ni hta chye na ai lam ni shai wa ai hpe hparan na malai, dai lam hpe yen nna, tinang chye ai hku lajang wa ai majaw NCA hta grau shanut ai lam ni byin wa ai, maga mi de mung NCA hta lawm ai myit hkrum da sai lam ni hpe tatut hkrang shala ai lam ni n’nga shi ai majaw, dai lam ni hpe mahtai tam na matu, seng ang ai wuhpung wuhpawng ni hte bawngban mat wa na.

Shada kam ai myit n’nga shi ai
■ NCA masa lam hta, shada kam ai lam hta, ningra ai lam ni nga ai majaw, bungli galaw hpang ai shaloi yak hkat dut dang ai lam ni byin wa nga ai, dai majaw shada kam hkat ai lam ni jat na wa lu na lam hpe lam tam galaw sa mat wa na.

NCA hta n’lawm ai lam ni hpe Myen hpyen ni maja tang shawn wa ai
■ Myen hpyen dap hku nna, NCA myit hkrum lam hta grai n’lawm ai, Myen mungdan kaw nna n’gran pru na lam hte, Hpyen dap langai sha tai na lam hte seng nna tang madun wa ai hta, dai lam ni hpe  myit hkrum jang she matut nna bawng ban na ngu ai masa lam byin wa ai, dai hta KNU ni chye na hkam la da ai gaw, shimlam hte seng nna bawng ban jahkum ngut jang she hpyen dap langai sha tai na lam hpe bawngban ra ai ngu hku re.

Mung Masa Bawngban Hpawng hta Wuhpung Yawng n’lawm nga ai
■ NCA masa lam hta, wuhpawng wuhpawng ni yawng shang lawm ai lam n’nga ai majaw, ginra n’kau mi hta majan  matut manoi byin nga ai, Mung masa banwg ban ai hta, NCA ta masat htu da ai ni sha n’ga, laga lak nak lang ai wuhpawng wupawng ni yawng shang lawm ra ai, tsang shagu hta yawng lawm lu hkra masa lam ni hpaw da ra ai, shing rai yang she, Myen mung dan hpe Federal Democracy masa lam hku gawgap lu nna, simsa lam gaw shaning galu ngang grin mat wa na.

KNU ni ndai hku ndau shapraw wa ai gaw, grai kaja ai ngu mu mada ai, maga mi hku tsun ga nga jang, KIO ni a mung masa, hpyen masa lam ni  jaw ai ngu pru mat wa sai.

KNU ni gaw NCA hpe shawng ta masat htu nna, laga wuhpawng ni lawm wa na matu aja awa woi awn ai majaw KIO ni woi awn ai UNFC mung ga gaprang mat ai, raitim Tsaban 21 Panglung zuphawng 3 lang galaw wa ai shaloi, NCA hkrum lam ka-ang hkup daram du wa ai hta, Myen ni a makoi magap da ai lam ni tang madun, maja myithkrum shangun wa ai majaw shawng de sit na matu yak mat wa sai.

Dai hta, byin wa ai masa hpe maram nna, NCA hpe jahkring gang hkring dat ai majaw, laga ta masat htu da ai wuhpung ni mung hpa n’mai galaw wa sai, ta masat htu da ai ni kaw nna KNU gaw wuhpung kaba n’gun ja dik re majaw re, Myen mung simsa lam gaw NCA masa lam hte n’mai hparan ai ngu mung lachyum pru wa nga ai.

Hpa Ni Mai Byin wa ai ta?
● KNU ningbaw ni hpe ahkaw ahkang  mayun kumhpa law law jaw nna zinlum mai wa ai
● KIO ni hpe ahpyawk nna, KIO ni tang shawn da ai lam ni hpe myit hkrum ya nna NCA hta lawm shangun ai lam ni galaw mai ai
● NCA hta grau lawm wa na matu majan grau laja ai masa mung byin wa mai nga ai

REF: KNU FB
Ja Tawng Naw

LEAVE A REPLY

Please enter your comment!
Please enter your name here