Myen Ni Ahkayk N’la N’mai Sai AA Rawt Malan Hpyen Hpung

2009 ning April shata kaw nna, Rahkaing amyu sha ramma marai 26 gaw KIO ginra hta hpyen majan hpaji sharin la ngut ai hpang, AA rawt malan hpung hpe gaw de sa wa ai gaw, 10 ning laman grai lawan ai hku, galu kaba rawt jat mat wa nna, Myen Asuya hte Myen Hpyen dap ni du hkra ahkyak kaba da ra ai masa de du wa sai.


Mungdan kata hte Mungdan shinggan kaw nga taw ai Rahkaing myu sha ni hta, AA kaw nna ndau shana da ai “ The Way of Rahkita 2020 “ ngu ai Arakan mungdan shanglawt lu na lam hpe, grai hkap la ra sharawng, madi shadaw nga ai hpe mu lu nga ai. Grau nna, Thai, Malaysia, Singapore, Japan mungdan hte laga mungdan kaw chyam bra nga ai Rahkaing myu sha ni hku nna mung, tatut jagumhpraw hte shata shagu madi shadaw nga ai majaw mung AA gaw, Grai ngang kang ai maga de re wa sai.


2019 ning January shata praw 4 ya, Myen mung rawt malan lu ai n’htoi hta, AA rawt malan hpung ni hku nna jarik sin Myen balik dap 4 hpe htim kasat ai kaw nna, Rahkaing mungdan hta majan grau laja wa ai. Myen Asuya hte Myen hpye dap ni hku nna AA hpe kasu kabrawng laknak hpung ngu masat nna, hpyen helicopter hte laknak kaba ni lang nna gasat ra ai madang de rai mat wa sai.


2019 ning January Shata praw 18 ya shani hta, Naypyitaw hpyen labau rung hta galaw ai shiga sang lang hpawng hta, Myen hpyen dap shiga shana shabra dap kaw nna AA rawt malan hpung hpe laja lana tsun shaga ai da ai lam ni nga ai.


Dai kaw nna ahkyak ai lam nkau gaw;
AA hpe hpye hpung hpe aja awa shamyit kau na hpe Myen mung hpaji jaw salang Awng Sann Suu Kyi nan matsun wa sai..
● AA Ningbaw tsun ai Confederation gaw Munghpawm Myen mung dang a matu hkrit tsang hpa lam re, dai majaw AA ni Simsa lam hte seng nna bawngban sa wa na nga jang Confederation ningmu hpe galai shai nna she shang lawm mai na.
● AA hpyen hpung nigaw Bangladesh hta machyu taw nna, ARSA mazut roi rip hpung ni hte kanawn mazum ai lam ni nga ai.


Lahta na shi laika sang lang hpawng hta Myen hpyen du ni tsun shaga ai hpe yu jang, Myen mung, mung shawa hte Rahkaing mung masha ni hpe, ya shanhte AA hpe gasat nga ai majan gaw jaw nga ai, ngu ai hpe mu shangun mayu ai masa hku lajang nga ai hpe mu lu nga ai.


REF: Myen Hpen Dap shiga, AA News
Ja Tawng Naw

Leave a Reply

Your email address will not be published. Required fields are marked *