Myen Mung Hte Seng Ai Awm Dawm Sawk Sagawn Hpung Ningbaw Hpe UN Shatsam

2019 ning April shata praw 2 ya shani hta, Myen mung hte seng lam ni hpe ndut ndang sawk sagawn lu na matu Awm dawm sawk sagawn hpung a ningbaw hpe American mungdan na tara kasa kaba Nicholas Koumjian hpe amu shatsam dat ai hpe chye lu ai.

Dai lam hte seng nna,” 2018 ning September shata 27 ya shani hta, Shyinggyim ahkaw ahkang kongsi hta hpawng ngut ai hpang, 2018 ning December shata 22 ya shani na UN ninggawn rapdaw zuphpang hta myithkrum shagrin da ai, Myen mung kata hta mungkan htung tara hpe tawt lai ai lam ni hte seng nna, ahkyak la wa na hta, tara shang matsing ningting ai lam ni la na matu wuhpung a ningbaw amu hpe Koumjian hpe shatsam dat sai, Mr. Koumjain gaw Mungkan mungdan ni hte ru hka amu hte seng nna tara kasa hku shaning 35 ning jan lit la gun hpai wa ai hta sha n ga, Mung kan ruhka amu daw dan ai lam ni hta shaning 20 ning daram mahkrum madup nga ai wa re,” ngu nna, UN a tsun shaga ahkang lu ai Salang kaba Stephane Dujarric kawn, shi laika sanglang hpawng hta tsun shaga wa sai.

Ndai hku shatsam wa ai hte seng nna, Myen mung a UN sumtsan Salang Hau Do Suan hku nna gaw, ndai hpung hpe nlu hkap la ai hte, Myen mung Asuya lajang da komishin hku sha sa mat na hpe bai tsun jahpra wa sai.

Myen mung hte seng nna awm dawm sawk sagawn hpung hku nna, galaw ra ai magam bungli ni gaw, 2012 ning kawn hpang ai Rahkaing mungdaw na Rohingya ni hpe Myen hpyen dap ni hku nna sat shamyit ai lam hte Myen mung amyu bawsang ni a ntsa hta shinggyim ahkaw ahkang tawt lai ai lam ni hpe sak se ni atsawm sha gahkyin la ngut ai hpang, matsing kyem da nna, Myen mung hte seng nna Mungkan ru hka tara rung de tang shawn ai lam ( sh ) Mung kan ru hka tara rung hpaw wa ai shaloi matsing ningting ni hpe tang madun na hku, tau hkrau lajang da ai hpe chye lu ai.

REF: VOA, UN News
Ja Tawng Naw

Leave a Reply

Your email address will not be published. Required fields are marked *