Myen Hte Seng Nna, Mungkan Tara Rung Ningnan Hpaw Na UN Shadut

0
84

2019 ning March shata praw 11 ya shani hta UN shinggyim ahkaw ahkang komishin a 40 lang na zuphpawng hta Myen mung hta shinggyim ahkaw ahkang tawt lai ai lam ni hte seng nna tsun bawngban ai lam hpe chye lu ai.

Myen mung a mabyin masa lam ni hte seng nna Mungkan tara rung ICC de shalai ra na re ngu nna Myen mung hte seng ai shinggyim ahkaw ahkang dat kasa kaba Yang Hee-Lee kawn tsun wa sai. Lama nna dai hku n mai galaw ai rai jang, Mungkan hta tara rung ningnan hpaw na matu shadut ai hpe chye lu ai.

Rohingya ni a ntsa hta tawt lai ai ru hka amu hte seng nna ICC dat kasa hpung ni Bangladesh de du nna tara shang sa sagawn ai hpe kaja ai lam rai sai hte, matut nna ICC de shalai ra na lam hpe tsun shadut sai.

Myen mung hte seng ai ru hka amu ni hpe 2011 ning kawn byin wa ai mabyin ni hpe sawk sagawn shinggyin la na matu Wuphung langai hpaw na hte seng nna shinggyim ahkaw ahkang kongsi kawn, 2018 ning Setemper shata htum hta shatsam wa sai.

Shinggyim ahkaw ahkang tawt lai hkrum da ai ni hku nna, dai laksan sawk sagawn hpung hte matut mahkai let hkrum shaga na matu ra ai lam ni hpe garum na matu Yang Hee-lee hku nna tsun sang lang wa sai.

Myen mung mabyin masa lam ni hpe ICC de shalai na hte seng nna, Myen Asuya maga de nna ayan ninghkap nga ai zawn, ndai lang na zuphawng hta mung UN Sumtsang salang U Kyaw Moe Tun hku nna aja awa ninghkap ai lam galaw wa sai.

U Kyaw Moe Tun hku nna Yan Hee-Lee hte seng nna tsun shaga wa ai hta, “ hkang sa ra ai masat da ai tara ni hpe n hkan galaw ai majaw, mung shawa ni hta kasu kabrawng ai lam ni byin wa ai, dai majaw shi hpe 2017 ning July shata na rapdaw zuphpawng myit hkru dawdan ai hte maren, Myen mung hta shang na matu ahkang n jaw sai, dai majaw ya na UN shinggyim ahkaw hkang dat kasa hte rau amu n galaw na matu lit nga ai, dat kasa kaba ningnan hte rau jawm galaw na matu myit mada ala nga ai,” ngu tsun wa sai.

Yang Hee-Lee hku nna mung, lamu ga policy nnan a majaw buga mare masha ni yak nga ai lam, Myen hpyen dap kaw nna hpaw da ai U-Pai company hte Myen Sut masa dap ni pawng nna nhprang sut rai htu shaw ai hte laga sut hpaga lam ni hta, dam lada ai hku shang lawm nga ai lam ni hte, Rahkaing, Jinghpaw hte Sam mung na mabyin masa ni hpe tang madun mat wa ai hpe chye lu ai.

REF: VOA, UN Human Right Council
Ja Tawng Naw

LEAVE A REPLY

Please enter your comment!
Please enter your name here