Myen Hpyen Hpung Ni N’gun Kaba Hte Htim Gasat Ai Majaw, AA Hpyen Dap Hpe Gan Yen

Rahkaing Rawt Malan hpung AA shara la da ai dap langai hpe, Myen hpyen hpung ni n’gun kaba hte htim gasat wa ai majaw, 2019 ning January shata 14 shani hta gan yen da ai lam chye lu ai.

Rahkaing mungdaw, Buhtigtaung ninghtanw, Thayetpyin mare hte ni ai shara hta, AA rawt malan hpung ni chyahkring mi shara la da ai hpyen dap hpe, Myen hpyen hpung ni hku nna n’gun kaba hte htim gasat wa ai majaw, majan grai laja lana byin wa sai, dai majan hta AA rawt malan hpung maga de nna hpyen ma marai 5 si hkala hkum nna, Myen hpyen dap kaw nna, Du agyi ni lawm ai marai 43 si nna, 38 hkala hkrum wa ai.

Majan gasat ai lam hta, Myen hpyen hpung ni hpyen la n’gun grau law wa ai majaw, dap hpe jahkring mi gan yen da ai sai.

2019 ning January shata praw 4 ya shani hta, AA rawt malan hpung ni Myen balik dap 4 hpe htim gasat ngut ai hpang, Myen hpyen dap hte AA rawt malan hpung ni, shani shagu ngu na daram majan byin nga ai hpe chye lu ai.

REF: Shawng lam shi sawk
Ja Tawng Naw

Leave a Reply

Your email address will not be published. Required fields are marked *