Munghpawm Rapdaw Hta 2008 Npawt Nhpang Gaw Da Ai Tara Gram Lajang Na Matu Galaw Hpang

2019 ning January shata 29 ya hta, (11) lang na Munghpawm Rapdaw bawngban hpawng hta, 2008 ning npawt nhpang gaw da ai tara hpe gram lajang na hte seng nna, 2008 ning npawt nhpang upadi gram lajang komiti hpaw hpang na hte seng nna, NLD amat U Awng Kyi Nyunt kawn tang madun ai hpe chye lu ai.

Tang madun wa ai hta gawda ai tara gram ra ai lam nkau mi gaw,
● Shawng hpang nbung ai hku nna, shai nga ai lam ni
● Simsa lam hte Democracy mungdan gawp gap lu na lam hta dut dang taw nga ai lam ni
● Mung masa Prti hkum law ai democracy galaw sa wa ai hta dut dang nga ai lam ni
● Democracy hta Lahkawng maga rap shara yu reng ai lam ( check & balance ) hta maga mi de sha rai taw ai lam ni
● Rapra ai ahkaw ahkang rau maren mara lu na matu hta, mung shawa hpe makawp maga ya ai lam n’nga ai tara ni
● Ra lata poi hta awm dawm lu nna tara rap ra ai lam nnga ai tara ni hpe
Gram lajang na hte seng nna, tang madun wa sai.

NLD amat tang madun ngut ai hpang, Myen hpyen dap a dat kasa Du jum up Maung Maung hku nna, rapdaw htung tara hte shai taw nga ai ngu tsun shaga let , ninghkap ai lam hpe galaw ai.

Munghpawm Rapdaw Hpa-awn Duwa Tangbau Hkun Myat hku nna, bai sanglang ai lam hpe galaw wa sai, raitimung Myen hpyen dap a dat kasa ni hku nna yawng rawt tsap nna ninghkap ai lam galaw ai.

Munghpawm rapdaw hpa-awn hku nna, ra lata mae la na hku lajang sa wa ai hta, lawu na hte maren mahtai hpe mu lu nga ai.

Mae mai jaw ai masha 601
Madi shadaw ai 394
Ninghkap mae jaw ai 17
Lapran hta tsap ai mae jaw ai 3
Mae jaw ai amat yawng 414,

Htam masum kaw nna myithkurm ai htam lahkawng du sai majaw, 2008 ning npawt nhpang upadi hpe gram lajang na komiti hpaw hpang dat sai. Ra ai lam ni hpe du wa na rapdaw bawngban hpawng ni hta matut galaw sa mat wa na hpe chye lu ai.

NLD party ni hku nna Asuya uphkang ai lam hpe, lit la hpang wa ai kaw nna, masum ning laman, 2008 ning npawt nhpang gaw da ai tara hpe gram lajang na hte seng nna, tsun shaga ai lam nau n’nga tim, 2019 ning hpang ai kaw nna, 2008 ning gaw da ai tara hpe garam lajang na hte seng nna lahkam hpang wa sai majaw, Myen hpyen du ni hte gara hku jam chya wa na hpe gaw yu maram ra sai.

REF: Eleven news, DVB
Ja Tawng Naw

Leave a Reply

Your email address will not be published. Required fields are marked *