Mongolia Mungdan Na KFC Seng Langai Hta Malu Masha Gung Byin Ai Majaw KFC Seng Ni Pat Hkrum

2019 ning February shata 20 ya shani hta, Mongolia mare ninghpum hta nga ai Zaisan KFC malu masha seng langai hta KFC sha nna, malu masha sha shut ai gung byin ai majaw tsi rung de marai 40 du mat nna, marai 247 jan gaw madawn ai lam hte kan mase ai lam byin ai majaw, Mongolia muk lum hta nga ai KFC malu masha seng yawng hpe jahkring mi pat kau ai hpe Miwa shiga dap Xinhua kawn chye lu ai.


Ulan Bator ninghtawn, Khan Uul mare na Zaisan KFC seng hta lang ai arung arai ni kaw nsan nseng ai majaw, Shigella rai kanu ( bacteria ) ni lawm wa nna, malu masha mari sha ai ni hta byin wa ai.


Shigella rai kanu ana kap wa sai nga jang, hkum kahtet ai, lasa gying ai, kan hkyeng, kan mase ai lam ni byin wa chye ai.


Mung kan hta mying kaba ai American KFC malu masha seng gaw Mongolia mungdan hta 2013 ning kaw nna hpaw hpang wa nna, KFC seng yawng 11 daram nga ma ai.


Myen mung hta gaw 2015 ning May shata kaw nna Yangon hta hpaw wa sai, Mungkan hta rai jang KFC malu masha seng yawng 15,000 jan nga ai hpe chye lu ai.


REF: New Straight times
Ja Tawng Naw

Leave a Reply

Your email address will not be published. Required fields are marked *