Miwa Mung Hte Galaw Nga Ai Wanleng Lam Masing Hpe Malaysia Ni Dawm Kau Sai

0
78

Miwa mung a China Communication Construction company hte galaw na matu myithkrum da sai, US $ wan hkying 20 daram manu ang ai Sinpraw hkinggau mayan matu mahkai hkrang leng lam ( East Coast Rail Link) hpe dawm kau na matu Malaysia mungdan Asuya Sut hpaga magam dap a, hkringmang hku nna 2019 ning January shata praw 26 ya shani hta tsun shaga ai hpe chye lu ai.


Ndai hku jahkring kau na lam hte seng nna, Hkringmang Mohamed Azmin Ali hku nna tsun wa ai lam gaw, “ Galaw ai shaloi na hkrat ang wa na gumhpraw grai law ai majaw hte Asuya hku nna ja gumhpraw ndang ai majaw, ” ngu nna tsun wa sai.


Ndai wanleng lam masing hpe jahkring kau ai majaw, myit hkrum ga sadi hte maren, Miwa Company hpe kade daram jaw ra na hpe maram nga ai hpe mung Mohamed Azmin matut tsun ai. Dai masing hte seng nna, laning mi laman hta, arang nre ai sha hkoi da ai kaw nna bai jaw ra ai, gumhpraw atu pyi US $ wan 120 daram jaw ra na hku ang wa sai.


Malaysia mungdan a hkringmang daju Dr. Mahathir Mohammad hku nna, 2018 ning August shata shaloi ndai masing gawgap na hte seng nna, n’mai byin wa ai majaw, Miwa mungdan hte hku hkau kanawn mazum ai lam mung n’hkra ai sha, hkrang leng galaw na masing hpe jahkring kau ra ai hpe tsun ga wa sai.


Miwa mung gaw mungkan hta sut hpaga hpe madung tawn nna, mungkan mungdan ni hpe gumhpraw arang hkoi ya nna, mungdan galu kaba ai bawngring masing ni hpe Miwa company ni hte sha galaw ai ladat hku nna, majen je nga ai hpe mu lu ai. Dai hta gaw gap wa ai masing ni hpe yu jang mung, ahkyak ai shara ni hta yawng miwa myu sha ni hpe sha lang ai hpe mung mu lu nga ai. Miwa kaw nna hkoi ya ai gumhpaw hte atu law wa nna yak nga ai mungdan ni ( Sirlangka, Myen mung ) law wa ai hpe mu lu nga sai.

REF: VOA, The Star
Ja Tawng Naw

LEAVE A REPLY

Please enter your comment!
Please enter your name here