Min Awng Hlaing Hpe Magnitsky Tara Hte Ahkyak La Lu Na Matu USA Lahta Rapdaw Amat Ni Tang Shawn

0
47

2019 ning March shata 20 ya shani hta, Myen hpyen dap Dap awn Daju Du daju Jum Min Awng Hlaing hpe American Asuya kawn , ahkyak la pat shingdang ai lam ni, galaw lu na matu Lahta rapdaw amat ni hpyi shawn ai hpe chye lu ai.

Myen mung hta Rohingya ni a ntsa hta adip arip zingri ai lam ni hte seng nna, lit nga ai ni hpe matut nna ahkyak la lu na matu, naw ra ai hpe tsun shaga wa sai.

Rohingya Muslim ni hpe sat nat roi rip ai lam ni hte seng nna, mung kan kawn tsun shaga nga tim, Myen Asuya maga de nna, lak lai kaja wa hkra galaw ai masa hpe n lu madun ai majaw, American maigan mung hkringmang Mike Pompeo hte Ja gumhpraw dum hkringmang Steven Mnuchin de hkringdat di nna, lahta rapdaw amat 4 kawn laika ka wa sai.

Rohingya ni hpe sat sharu kau ai lam hte seng nna, Myen hpyen dap a chyawm tari ningbaw mali hpe 2018 ning August shata kawn pat shingdang ai lam ni galaw tim, tang du ai lam n nga ai ngu Lahta rapdaw amat ni tsun shaga wa sai.

Dai majaw, Min Awng Hlaing hpe Magnitsky tara hte ari jaw, ahkyak la na matu shadut da sai. Magnitsky Tara gaw, shinggyim ahkaw ahkang tawt lai ai maigan mung na lit nga ai ni hpe, shanhte a ja gumhpraw shaw jai ai lam hte, USA mungdan de du shang na lam ni hpe pat hkum mai ai tara rai nga ai.

Lai wa sai, February shata hta, Min Awng Hlaing hku nna, Japan shiga dap Asahi shimbun hte san htai ai lamang galaw ai hta, Rohingya ni hpe sat nat roi rip ai lam hpe, galaw ai hte seng nna, teng ai sakse ni tsep kawp n nga ai lam hpe tsun shaga wa sai.

REF: Channel New Asia, BBC
Ja Tawng Naw

LEAVE A REPLY

Please enter your comment!
Please enter your name here