Mali Hka Madim Hte Seng N’na Hkrat Ang Ai Made Bai Wa Ya Na lam Miwa Gumsan Magam Hpe Shana

0
25

Mali hka madim prat tup Jahkring kau na hte seng nna, woi awn ai ning shawng hpung ni hku nna 2019 ning April shata praw 20 ya shani, Yangon muklum Novotel hotel hta, galaw ai “ Mali Hka hpe bai lata shaw na” ngu ai gabaw hte tsun shaga wa ai lamang hta, hkrat ang ai mali hka madin masing manu hpe bai wa na matu Miwa Gumsan magam de shawa hpe shana ai laika sa ai hpe chye lu ai.

Jahkring da ai Mali hka madim hpe Miwa sumtsan salang hku nna bai gawgap mayu ai lam, shiga ni mawng pru wa ai majaw, mung shawa ni grai tsang nga ai lam hpe, shawa hpe shana ai laika ga nhpaw hta shalawm da ai.

Miwa Gumsan Magam Xi Jinping de shagun ai laika hta, Mali hka madim hpe bai galaw wa jang, Wunpawng Jinghpaw amyu sha ni a labau shang htunghking ni hten mat na lam, shingra tara hten za mat na lam ni hte, Myen mung simsa lam hpe mung hkra machyi ai lam ni a majaw, Myen mung mung shawa ni grai tsang nga ai lam ni hpe shalawm da ai.

Ndai hpe matut nna galaw na nga jang, Myen mung shawa a sari sadang hpe shadaw kau ai, dang sha hkrum ai ngu matsing la mat mai ai majaw Miwa hte Myen ni a lapran hta kanawn mazum lam ni n kaja ai hku byin pru wa mai ai ngu tsun da nga ai.

Dai majaw, Mali hka madim hte seng nna, Miwa ni hku nna, myit hkrum sakse laika hta lawm ai hte maren tara shang hkrat ang ai gumhpraw ni hpe bai wa ya na lam hte, dai hpe mahtai langai hku hkap la na hpe shadut tsun wa sai.

Dai lam hte seng nna, Myen mung shawa ni hpe marai langai mi 1$ jaw bang na matu, Mali hka madim hpe bai hkye ai woi awn hpung kawn tsun shadut dat ai hpe chye lu ai.

REF: Irrawaddy
Ja Tawng Naw

LEAVE A REPLY

Please enter your comment!
Please enter your name here