Malaysia Hta, Num Kasha Langai Mi Beer Ndau Ai Shaloi Amyu Lachyen Lahka Hkrum

0
33

Malaysia mung shawa ni, shopping mall hta beer chyim ai ndau lamang  galaw ai hte seng nna, jamjau n’jahkrum na matu, shinggyim wuhpawng media hta tsun shaga nga ai hpe chye lu ai.

2018 Nov shata 20 ya shani hta, Malaysia mungdan Kuala Lumpur  mare, Ampang lawk na Giant Shopping Mall langai hta, Miwa num kasha langai mi, beer chyim ai ndau lamang galaw nga ai shaloi, gat  mari sa ai Malay la ( Edi Rajang)  gaw, ndau ai lam hte seng nna tsun shaga wa ai shaloi, Malaysia mungdan re ai majaw Malay ga hku shaga na hpe tsun let,  jamjau jaw ai hku nna mara shagun ai lam galaw wa sai.

Ndai lam hte seng nna, MCA (  Malaysia Chinese Assembly ) a ningbaw Datuk Heng Seai Kie hku nna gaw,  Malaysia a prat nnan daw hta, ndai zawn amyu nbung ai myu shayi sha, amyu sha ni a n’tsa, ya na zawn amyu lachyen lahka ai lam hpe matut  galaw nga ai majaw, myit daw hpa langai re ngu nna tsun ai.

Matut nna, ndai zawn lam ni bai  nbyin na matu, Seng ang ai balik dap de sumtang shana da sai.

Miwa num kasha hku nna, atsawm sha pri nem ai hku nna  bai htai lai tsun dan ai majaw,  Heng  hte  shawa malawng gaw shi hpe shakawn nga ma ai.  Malysia hpe, nbung ai  amyu sha ni hku nna, simsa ai, myit hkrum ai hte hku hkau rau jawm galaw sa ai, masat kumla langai mi tai ra ai ngu Heng hku nna matu tsun  jahpra ai.

Malaysia mungdan gaw Democracy mungdan mi rai tim, nkau mungdaw hta  Islamic nawku htung a Sharia upadi hku uphkang ai lam ni nga ai.

Malaysia mungdan hta, Myen mung masha sen 4 daram amu galaw nga ai hpe chye lu ai.

( Dai hpawt na shiga bai lu ai nga jang, Malay la Edi hku nna, Gait Shopping mall hte beer company ni hpe mara hpyi nem sai lam hpe mung chye lu ai)

REF: Star News

Ja Tawng Naw

LEAVE A REPLY

Please enter your comment!
Please enter your name here