Mabyin Bung Tim, Hkam Sha Lam Nbung Ai Wunpawng Ni

0
63

( Lasang Sang Li ka da ai hta amyu sha ni hte seng n’na myit ra na lam ni lawm ai majaw bai share dat ai. )

KBC Saranum 2 sat hkrum ai hte, Jan Nhkum Nang Htang sat hkrum ai mabyin bung ai.

Rai tim Wunpawng Ni a myit hta n bung sam ai. Daini hkying 11:30 aten hta Nam Sung hta sat kau hkrum ai #Jan_Nhkum_Nang_Htang a ngam nga ai hkum tsawp hpe makoi mayang ai lam galaw sai re. Nta masha ni yawng grai yawn hkyen hkrum nga ma ai.

Rai tim nta masha ni hpe shalan shabran ai lam hta Wunpawng ni yawng grai gawng kya mat ai hpe mu mada nngai.​ Jan_Nhkum_Nang_Htang a sat hkrum ai lam gaw, Kawng Hka kaw KBC Srn. yan a sat hkrum ai hte bung ai. Nbung ai lam gaw Wunpawng myu sha ni a hkam sha lam re. Srn. Yan sat hkrum ai ten grai yawn ga ai. Wunpawng ni yawng lam nmaw de pru wa nna marawn jahtau hkrap ngu hkrap ngoi rai ga ai.

Rai tim…Jan_Nhkum_Nang_Htang a sat hkrum ai lam hpe Wunpawng ni yawng yawn hkyen ga ai i? Nkau mi gaw chye pyi nchye ma ai.

Srn. Yan hte #Jan_Nhkum_Nang_Htang a ntsa Wunpawng ni a hkam sha ai lam shai nga ai hpe tang madun na.

#1. Media ni.

Srn. Yan a mabyin hpe mungkan shiga lawk de du hkra Kachin media ni shakut lai wa masai re. Rai tim Jan Nhkum Nang Htang sat hkrum ai shiga hpe tara shang Kachin media langai mi kaw pyi ka ai lam nmu ai.

#2. Srn. Yan a mabyin hta hpung magam gun ni law law shang lawm ma ai. Grai shakut ma ai. Rai tim…Jan Nhkum Nang Htang a mabyin hta hpung magam gun ni nchye masu su rai myit sharawt ai lam kachyi pyi n galaw ma ai. (KBC a Srn. Nrai na Kun?)

#3. Srn. Yan hpe Kawng Hka mare kaw na, MKN de htaw lung wa ai lam dingdung Wunpawng mung shawa masha ni hkrap ngu hkrap ngoi hte tau hkalum ma ai. Mare kaba nawku jawng shagu kaw mang hpai bang na kyu hpyi n gun awai ai lam galaw ma ai.

Rai tim…Jan Nhkum Nang Htang hpe Lashio tsi rung hta Medical Crime Record la na matu Nampaka kaw na htaw sa wa yang, Kutkai buga ni, Man Ping Buga ni, Sinli Buga ni yup pyaw nga ma ai. Ramma ni sha pyi lam ntsa kaw myi man madun yang mai ai re le… Lashio du yang mung buga lit hkam langai lahkawng hte, ginwang magam gun langai lahkawng hpe sha mu ai. (Tsi jep ai shani Lashio ramma marai 10 ram sa du ma ai)

#4. Srn yan a mabyin hta Mung Myit Sinli ga e byin ai rai tim yawn hkyen ai lam gaw Wunpawng mungkan ting re.

Rai tim… Mung myit sinli ga e Jan Nhkum Nang Htang sat hkrum ai lam hta Jinghpaw mung e nga ai Wunpawng ni a nsen kachyi pyi nna ai. Wunpawng mungkan ting yup mahka taw ai nre i.

#5. Srn yan a mabyin hta KBC ting gara ai. Rai tim Jan Nhkum Nang Htang a mabyin hta KBC ginjaw a nsen nna ai.

#6. Srn yan hpe lup makoi ai ten, Nawng Nang Gawk Nu kaw kyu hpyi hpawng galaw ai. Masha manu mana sa du yawn hkyen shalan shabran ma ai.

Rai tim…Jan Nhkum Nang Htang hpe gaw shi a kanu kawa dum nta kaw kyu hpyi hpawng galaw nna, lup ding lupwa de wa sa ai. (Ndai lam hpe gaw chye na ya ai)

Sa du shalan shabran ai masha gaw nlaw nla sha re. Nta masha ni yawn ai hta grau yawn na lam pru ai. Kaga n bung hkat ai lawng lam ni grai naw nga ai.

Rai yang Wunpawng ni yawng hpe ga san san mayu ai….Jan Nhkum Nang Htang a sat hkrum ai lam gaw Wunpawng ni yawng hte nseng ai i?

KBC dat da ai masha nre ai a majaw i?

Hpa mi rai rai, pu gang sin machyi ai hte,

Buga ni, Gin wang ni, KBC, RMC ni hku nna masha hkum nan nlu du tim pyi, yawn hkyen ai lam laika pa sha pyi nmai sa ai i?

Ya na zawn tinang hte nseng ai zawn nga ai rai yang, anhte Wunpawng myu sha ni a shawng lam myit hkrum gahkyin kumdin ai lam hta manu mana hkra machyi mat wa na re.

Wunpawng Mungdan a matu asak ap nawng gwi ai lam hta a htu hkra mat wa na re.

Ra ahkyak ai aten hta Tsawra myit madun ga. Yawn hkyen hkrum ai aten ni hta arau yawn hkyen ga!

Ngwi pyaw ai aten, kabu gara ai aten hta mung arau rai ga!

Wunpawng ni e…!

REF: Lasang San Li

Ja Tawng Naw

LEAVE A REPLY

Please enter your comment!
Please enter your name here