Laswi Galai Bang Ai Tsi Lajang Ngut Ai Hpang AIDS Ana Marai Lahkawng Hta Mai Tsai Lu Sai

2019 ning March shata praw 5 ya hta, HIV ana lu ai wa ai hpe nra kata na laswi galai bang ai ladat hte , shaning galu tsi lajang ya ai hta, HIV ana mai mat sai lam hpe chye lu ai.

Nra kata na laswi hta nga ai lasa kaji ( stem cell ) hpe HIV ana lu ai wa hta galai bang nna tsi lajang ya ai shaloi, HIV ana shaning na na hkam sha nga ai kawn mai tsai wa nna, ndai ladat hte galaw ai chyam dik lik ai lam awng dang wa lu sai. Ndai awng dang ai lam gaw marai lahkawng rai sai hpe chye lu ai.

Chyam dik lik hkrum wa gaw shata 18 tup HIV ana n nga mat sai hpe lu tsun tim, tsep kawp awng dang sai ngu tsun na matu loi naw jau ai hpe hpungtang hpajji shi laika hta ka da nga ai.

Laswi kata na (stem cell ) hpe gam jaw ai wa kaw nna masum ningtup galai bang ngut ai hpang, HIV ana mai mat nna shata 18 tup matut HIV ana hpe sawk chyam dik lik yu ai hta, HIV ana nga ai hpe n mu tam wa sai.

“ Anhte shadawn yu wa ai hta ana nga ai hpe n mu lu sai, ana hpe tam sagawn a mu mat sai,” ngu HIV ana lu ai wa hpe woi awn tsi ai, HIV hte seng ai nsoi hpaji ninghkrin munu Ravindra Gupta kawn tsun shaga wa sai.

HIV ana mai tsai mat ai machyi masha hpe “ London machyi masha” ngu shamying da ai. Shawng na wa hpe gaw, “ Berlin machyi masha” ngu masat da nna, 2007 ning hta Germany mungdan hta laswi galai bang ai tsi lajang hkam la ngut ai hpang, HIV ana mai mat wa nna, American mungdan hta sak hkrung hkawm sa nga sai.

Mungkang hta HIV ana kap nga ai masha wan 37 daram nga ai hpe chye lu ai.

REF: Aljazeera
Ja Tawng Naw

Leave a Reply

Your email address will not be published. Required fields are marked *