KIO Hte Myen Ni A Bawngban Hpawng Awng Dang Ai Hku Shangut Lu

0
20

2019 ning January 21 ya shani hta, Miwa mung Hkwiming Muklum hta, KIO hte Myen Asuya simsa lam komashin wuhpung ni hku nna, simsa lam hte seng nna, kaja ai masa hte bawngban shangut lu sai lam hpe, chye lu ai. KIO maga de nna gaw, Ningbaw kaba malai Dukaba Sumlut Gum Maw woi awn let, Myen maga de nna gaw, NRCP a ningtau ningbaw Thein Zaw woi awn let hkrumzup bawngban hpawng galaw wa sai.

Zuphpawng kata bawngban ai lam ni kaw nna, ahkyak ai lam n’kau mi gaw,

● February shata kawn simsa lam hte seng nna, bawngban ai lam ni hpe matut galaw sa mat wa na.

2018 ning hta KIO kaw nna tang madun da ai, Myen hpyen dap hte gap hkat jahkring ga sadi hpe galaw sa na hte seng nna, Myen Asuya kaw nna hkap la na zawn masa byin wa ai hpe Chye lu ai.

Lahta na masa lam ni hpe bai maram yu jang, kaja ai zawn gaw nga wa tim, aten kadun labau hpe bai nhtang yu jang, Myen Asuya hte Myen hpyen dap yan gaw, Simsa lam hpe NCA lam hku nna KNU, RCSS, CNF, PNLA ni hte madung tawn nna, tsang hte tsang lajang mat wa na hku grai shakut wa ai hpe mu mada lu ai, grau nna KNU ( Karen ) hte PNLA ( Pa-O) hku nna gaw, NCA hta KIO hte laga ni n’lawm wa tim, Myen mung amyu bawsang ni a gawng malai shanhte ni hku nna shawng lajang magang mat wa na hku grai tsun shaga wa sai (De a majaw mung, Jinghpaw mung hte Sam mung hta majan grau laja ai hku ang wa ai ).

Dai lam hpe laga rawt malan hpung ni hkap la wa na re ngu hkam la let, grai shakut galaw tim, 2018 ning htum wa maga de, “ Myen mung kaw nna garan n’pru na ngu ai lam hte, Laknak lang hpung langai sha tai na lam ni hte seng nna, n’ru nra byin wa nna, KNU hte RCSS ni NCA a tara shang zuphpawng lung ai hpe jahkring ai masa de, n’htang hku rai mat wa sai.

Dai majaw, Myen ni gaw zai ladat bai jashai ai hku nna, KIO lawm nga ai dingdung rawt malan hpung ni hpe galang bai ahkyak tawn let, shanhte Myen maga de nna, jahkrum shaga mai na masa de du wa ai zawn zawn Shanhte she simsa lam hpe grau ra sharawng ai zawn zawn, mungkan hpe masu madun ai ladat rai wa ai hpe mu mada lu nga ai.

REF: Shawng lam Shi Sawk
Ja Tawng Naw

LEAVE A REPLY

Please enter your comment!
Please enter your name here