Kachin IDPs Ni Wa Ten Du Sai I ?

0
34

Nam San Yan buga mare masha ni htinggaw 2000 jang nga ai kaw nna, htinggaw 17 daram gaw 2018 ning December 20 jan ha, bai wa hpang taw sai lam hpe chye lu ai. Dum n’ta grai laja lana n’hten nna, gram lajang loi ai ni mahtang shawng wa hpang sai PCG ni tsun ai.

PCG group ni hku nna, hpyen yen ni bai wa lu na lam hte seng nna, KIO hte Myen hpyen dap lapran hta bawngban jahkrum ya nga ai. Myen hpye dap hku nna, shanhte hkam da ai bawm ni hpe bai jasan dawm ai lam ni hpe galaw ngut sai hpe Ma-pa-hka Tai Mu hku nna PCG ni hpe tsun ai. Laga lam ni hpe gaw KIO ni hte bawngban jahkrum ngut jang she lajang mat wa na hpe chye lu ai.

Hpyen yen ni ndai zawn bai wa ai lam gaw, Myen hpyen dap ni shata 4 gap hkat jahkring ai lam ndau ngut ai hpang hte Myen Asuya a hkai sun lamu ga hte seng nna tara upadi ningnan shagrin dat ai majaw, byin wa ai lam re.

KIO a lit nga ai Salang langai hku nna tsun shaga ai gaw, Myen hpye dap hte myit hkrum ai lam ni atsawm bawng ban jahkrum ngut jang she hpyen yen ni bai wa ai lam hpe galaw lajang na ngu tsun wa sai.

Lahta na mabyin ni hpe yu nna, ya aten hta hpyen yen IDPs ni kaja wa, buga mare de wa ten du sai i ngu nna jawm myit ra wa ai aten rai wa sai.

Mungkan hta shanning galu majan gasat gala manghkang byin ngut ai hpang hpyen yen tsinyam, IDPs ni tinang mare buga de bai wa na lam hta lawu na hte maren masat masa di nna galaw ya ai hpe chye lu ai.

  • Tinang nan ra sharawng nna wa ai lam rai ra ai
  • Sari sadang hte hpring ai, wa ai hkrum lam rai ra ai
  • Majan gasat gala hkring ai hkam daga nga ra ai
  • Nang kang ai simsa lam nga ra ai
  • IDPs ni a shim lam nga ra ai
  • Hkam bawm, machyu pala ni hpe jasan dawm kau ra ai
  • IDPs ni a hten run mat ai dum n’ta ni hpe gram lajang, gaw gap garum na lamang nga ra ai
  • Masat shara n’nga mat ai sunwang ni hpe, tara shang bai lajang ai lamang ni nga ra ai
  • Si hkala hkrum ai IDPs ni hte seng nna, tara je yang ai lam ra ai (sh) machyi sum ai ni hpe lama ma bai lajang ya ai baw lamang ni nga ra ai
  • Mare hta tinang lagaw tinang bai lutsap hkra garum madi shadaw ya ai lam ni ra ai
  • Lahta na lam ni hpe yu reng na hpung ni nga ra ai, ngu ai lam ni re.

Lahta na lam ni hte maram yu let , IDPs ni wa mai ai masa lam de rai sai kun ngu nna atsawma myit ra sai. Wa mai ai masa lam hku n’re ai ten hta wa jang, lama ma a majaw kalang bai tsinyam hkrum sha chye wa ai.

Ya anthe a Wunpawng buga ginra masa ni hpe bai yu maram jang, majan atsawm hkring ai lam n’nga shi ai, simsa lam hte seng nna mung bawng ban jahkrum nga ai dingyang naw re, dai majaw aten n’tam ai sha majan gasat gala hkat ai lam ni byin wa mai ai hpe dum ra na re.

Dai hta grau nna gaw, lahta na lam ni hpe Simsa lam bawngban ai hta IDPs ni wa na lam hte seng nna gabaw langai hku nna bawng ban shalawm la ra nga ai.

Myen ni gaw, IDPs ni hpe aloi sha wa shangun mayu ai, grau nna Myen mung hta IDPs ni n’nga ai ngu mungkan hta shana mayu ai ( Shanhte zingri da ai lam ni hpe magap kau mayu ai). Myen ni hpyen masa hku mu mada ai lam langai gaw, KIO ni shan hte Myen ni hpe ja ja ninghkap lu nga ai gaw, IDPs ni a garaum shingtau ya ai majaw mung re ai ngu nna hkam la let, IDPs ni hpe dumbri dumbra wa kau shangun mayu nga ai.

Dai majaw, anhte IDPs ni hku nna, Hpyen yen dabang hta grai jamjau hkrum nga tim, lahta na lam ni hpe shingdaw yu let tinang hpe woi awn nga ai ningbaw ningla ni a matsun hte maren lajang sa mat wa ga.

REF: VOA, OHCHR
Ja Tawng Naw

LEAVE A REPLY

Please enter your comment!
Please enter your name here