Kabu Hpa Hkristmas Masat Kumla Ni

0
23

Ngwi pyaw kabu gara ai Sweet December hte Hkristmas rai u ga law. Madu Yesu shangai chying hkai wa ai December shata hta, Hkristan hpung masha ni sha n’ga, mungkan masha malawng mung, kabu pyaw ai hpe mu lu ai, Nawku jawng, dum n’ta, shopping mall ni hta Hkrsitmas masat kum la ni hpe shatsawm shakya da ai hpe mu lu nga ai.  Dai majaw, mungkan shara shagu hta lang nga ai Hkristmas hte seng ai masat kumla ni a lachyum ni hpe grau chye na lu na matu  tang madun da tai.

Lamu Kasa
Lamu kasa a kumla gaw, Hkye hkrang la ai Madu Yesu shangai wa ai shiga hpe shana shabra htawn tsun ya  ai lachyum re. Anhte  Hkristan ni mung, Madu Yesu shngai wa ai lam hpe myit hta kabu gara let, htawn tsun shana shabra nga mali ai.

Dingsi 


Dingsi dum ai nsen na jang, lam dam nga ai sagu ni dai nsen na ai shara de sa wa ai majaw, tinang wuhpung hte bai du ai ngu ai lachyum re. Hkristmas dingsi  lachyum gaw,  Karai Kasang a man hta yawng gaw manu dan nna, Shi yawng hpe lam n’dam na matu garum nga  ai lachyum re.

Tsit Lali Ai Hpun 


Tsit lali ai Hkristamas hpun a lachyum gaw,  Karai Kasang a n’htum n’wai ai,  grin nga ai tsaw ra myit hte asak a lam hpe tsun nga ai. Madu Yesu  hpe kam sham ai a marang e,  anhte  ni yawng htani htana asak lam de mai du nga ai hpe dum na matu re.

Hkristmas Kumhpa
Hkristmas kumhpa a lachyum gaw, Karai Kasang gaw shi a kasha shingtai  Madu Yesu hpe kaba htum ai kumhpa hku nna  anhte yawng hpe jaw nga ai hpe bai dum nga na hku ang ai. Hkye Madu gaw anthe hpe htani htana asak jaw ai hte maren, laga masha ni hpe mung,  tsawra ai hte matsun dum lanu lahku ai lachyum lawm ai Hkristmas kumhpa ni hpe jaw ai kumla re.

Nampan Shanghkawng   


Karai Kasang a tsawra myit gaw galoi mung n’htum ai ngu ai  lachyum hpe la ma ai. Nampan shanghkawng hpe  tsit lali ai nampan hte mawn ai lachyum gaw, htani htana asak a lachyum hpe tsun nga ai.

Santa Claus
Lai wa sai aten hta, St. Nicholas gaw hkyen ai hpun palawng  hpun n’na kumhpa hkan jaw ai lachyum gaw. Mungkan masha ni hpe Madu Yesu gaw tsawra nna   hkye hkrang la ai  hpe  dum shingran let, n’ta shagu shang nna kumhpa jaw ai hpe galaw wa sai.

Wan Kinlep ( Candle ) 


Madu Yesu gaw mungkan ga a ninghtoi re ai hpe dum na matu re. Madu Yesu gaw ninghtoi re ai majaw, shi madun ai  mungga n’htoi lam de hkan  nang hkan sa ai rai jang, anhte ni,  lam n’shut ai sha hkye hkrang la ai chyeju lu na  ngu ai lachyum hku la ai.

Mak-um Shingna Magaw ( Candy Cane ) 


Mai-um shingna magaw   gaw, sagu rem ni  shan hte a lam dam nga ai sagu ni hpe, wuhpawng de bai du wa na matu lang ai lachyum re.  Hkye hkrang la ai Madu Yesu gaw, Sagu rem wa kaba rai nna, anhte hpe lam nshut na matu madun nga ai kumla hpe lang ai.

Shagan 


Hkristmas shagan gaw, Bethlehem mare hta Madu Yesu shangai wa ai ntsa hta htoi tu nga ai hpe lachyum la ai.  Dai hte maren, Madu Yesu gaw, Mungkan ga a ninghtoi rai nna, mungkan masha yawng hpe myit mada shara jaw nga ai, lam madun   nga ai hku nna lachyum hpe shaleng da nga ai.

Dai ning na Hkristmas ten hta, Hkristmas hte seng ai kumla ni kaw nna, anhte ni n’lawm htum langai hpe mahta la nna, shi a lachyum hte maren mungkan hpe shatsawm sa wa ga.

REF: Making Life Blissful

Ja Tawng Naw

LEAVE A REPLY

Please enter your comment!
Please enter your name here