Jinghpaw IDPs ni Mare Buga Bai Wa Na Matu UN US$ Wan 40 Garum Na

0
24

UNOCHA Hkye mawoi hpung a amu madu Ursula Mueller hku n’na Jinghpaw mung de du sa ai hkrum lam hta, Myitkyina hte Waimaw IDPs ni hta nga ai IDPs ni mare buga bai wa ai lam hte, aten galu nga mu nga mai lu na matu US$ wan 40 jan, garum ya na hpe Jinghpaw mung Hkyen lakawn Hkringmang U Nay Win kawn tsun wa sai hpe chye lu ai.

2019 ning May shata 10 ya shani hta, Jinghpaw mung hkringmang daju rung gawk hta, UNOCHA hkye mawoi hpung a amu madu Mueller hte Jinghpaw mung Hkringmang daju, Hkyen lakawn dap hkringmang hte Tara agyi daju ni lawm let, bawngban hpawng galaw ngut ai hpang, UN kawn US$ wan 40 daram mai garum ai ngu ai myithkrum lam lu wa sai.

Mueller Jinghpaw Mung Hkring mang rung de du shang wa ai

Jinghpaw mung hte Sam mung hta, Myen hpyen dap hte Shanglawt myu tsaw hpye dap ni 2011 ning June shata kawn kalang bai gasat hpang ai gaw, 8 ning du hkra galu wa sai. Ya ten du hkra, simsa lam hte seng ai, mung masa bawng ban ai lam ni gaw gaja ai mahtai hkrak n mu lu shi nga ai.

Raitimung, Nkau IDPs ni tinang mare buga de sari sadang hte bai wa lu na matu hte, mungkan madang hku masat da ai hte maren galaw sa wa lu na matu Jinghpaw tsinyam garum ningtum hpung ( KHCC ) kawn Asuya woi awn ai NRPC ni hte hkrumzup bawngban nga sai.

Asuya kawn masing kaba hte IDPs ni hpe shara ningnan de lajang jahkrat ya na shara hpe, IDPs ni hku n’na ra sharawng ai n nga ai sha, miyat shanhte a buga ginra de sha bai jahkrat ya na hpe sha ra sharawng n’na, bawm ni hpe bai dawm ya na matu hte dum n’ta ni hpe garum gaw gap ya na matu IDPs ni ra sharawng nga ai hpe, IDPs ni hpe garum ya nga ai wuhpung ni hku nna tsun shaga wa sai.

Myen hpyen dap hte KIA lapran hta simsa lam hte seng ai lam ni mung matut jahkrum galaw sa ra ai lam ni nga ai majaw, IDPs ni bai wa na lam hta, shimlum ai lam hte simsa lam gaw No 1 ahkyak ai ngu tsun wa sai.

REF: UNOCHA, BBC, Eleven
Ja Tawng Naw

LEAVE A REPLY

Please enter your comment!
Please enter your name here