Japan Karate ShingJawng Poi Hta Jinghpaw Ma Masum Ja Shagrau Dazik Hkam La Lu

Japan mung dan hta galaw ai International Karate Friendship 2019 Championship, karate ginsup shingjawng poi hta, April 21 ya shani hta Maran La Ja, San Mai Nu hte Seng Lat Aung ni marai masum hku nna ningtawn ninghkrin Ja Shagrau dazik lu la ai lam hpe chye lu ai.

Mungkan madang Karate shingjawng poi hta ningtawn ninghkrin ja kumhpa shagrau hkrum ai ma masum gaw, Myitkyina muklum kawn rai nna asak 8 ning re ai Maran La Ja gaw Myitkyina Du kahtawng IDPs camp na re ai hpe chye lu ai.

Maran Laja gaw 2018 hta Singapore mungdan hta galaw ai Asian dan a mungdan 10 ginsup ai poi hta mung Ja dazik lu la ga sai.

Asak 7 ning re ai San Nu Mai gaw, “ grai kabu ai, grai yak hkra gaw nre ai, nau ma nba ai, loi li sha ba ai, kyu hpyi garum ya ai ni hpe ma chyeju kaba sai, grau shakut na re, Mungkan madang hta ja dazik lu na matu myit mada da ai,” ngu tsun wa sai.

Asak 5 ning re ai Seng Lat Aung gaw, “ grai kabu ai, Madu Yesu hpe mung chyeju dum ai, Sara ni hpe ma chyeju dum ai, yawng hpe chyeju kaba sai,” ngu tsun wa sai, shi gaw 2 lang grup ginsup nna ja dazik hpe lu la wa sai.

International Karate Friendship 2019 Championship poi gaw World Cup Karate Championship ngut jang no 2 madang hta nga ai shingjawng poi re ai hpe chye lu ai.

REF: BBC
Ja Tawng Naw

Leave a Reply

Your email address will not be published. Required fields are marked *