IDPs Ni Bai Wa Na Lam Hta NRPC Hte KHCC Ni Zuphpawng Galaw

0
19

2019 ning April shata 26 ya shani hta Hpyen yen lakawn lanawn hpung KHCC hte NCPC ni hku nna Kachin IDPs ni mare buga de bai wa lu na lam hte seng nna, Nay-pyi-daw muklum NRPC hta zuphpawng galaw ai hpe chye lu ai.


Bawng ban hpawng hta KHCC ningbaw Rev. Dr. Hkalam Samson hku nna, “ IDPs ni mare buga de bai wa lu na matu gaw, hpyen majan hte matut mahkai nga ai majaw, Myen hpyen dap hku nna, amyu bawsang ni a ntsa hta kam ai myit ningmu san ra ai, amyu bawsang ni a ginra hta majan gasat ai hpe shayawm nna, IDPs ni grau kam hpa wa hkra, lai wa sai aten hta hpyen dap n nga ai shara hta jung da ai hpyen dap ni hpe bai dawm kau nna, simsa lam ni hpe galaw lu jang gaw, IPDs ni mare buga de bai wa lu na lam hta, aten kadun laman hta awng dang ai hku lu galaw na re, “ ngu tsun shaga wa sai.


Dai hte maren, NRPC hpung a malawm tara kasa daju Tun Tun Oo hku nna gaw, “ gap hkat jahkring ai gaw, grau madung re ai, dai lu galaw jang she, hpyen hyen ni hku nna tinang mare buga de bai wa lu na, dai majaw KHCC hte mung shawa ni hku nna mung KIO shadut ya rit, majan gasat ai lam n nga jang she, KHCC ni hku n’na, hpyen yen ni hpe kaja wa grau lu garum na re,” ngu bai tsun shaga wa ai.


NRPC hpung hte galaw ai bawngban hpawng hta lam manga hku nna myit hkrum da ai hpe chye lu ai:


1) IDPs ni sari sadang hte bai wa na lam hta NRPC kawn jahkrat sa wa na hkrang tara ni hpe KHCC hte jawm galaw lajang mat na


2) IDPs ni bai wa ai lam hta, Asuya dap ni, wuhpung wuhpawng ni lapran hta bawngban jahkrum ai shaloi, KHCC hku nna grau masan sa hkra shang lawm lajang na


3) IDPs ni mare buga de bai wa ai lam hta, dum n’ta gawgap ai lam, malu masha madi shadaw ai lam, madu bungli hpe bai galaw lu na lam ni hta KHCC kawn matut mahkai, garum madi shadaw na


4) Mai wa ai buga ni hpe Pilot program lata la nna ningshawng galaw chyam yu ai lam galaw na matu jahkrum galaw sa na


5) IDPs ni mare buga bai wa ai lam hta, grau masan sa wa hkra KIO/KIA ni hte jahkrum na matu KHCC kawn lit la mat na, lam ni lawm ai.


Asuya dat kasa U Zaw Htay hku nna gaw du wa na April shata 30 ya shani hta galaw na KIO hte bawngban hpawng hta, gap hkat jahkring ai lam hpe lu hkra galaw na re ngu tsun ai hpe chye lu ai.


REF: NRPC, RFA
Ja Tawng Naw

LEAVE A REPLY

Please enter your comment!
Please enter your name here