Gaza – Israel Gasat Gala Byin Palestine Marai 4 Si Hkala Hkrum

0
58

Gaza gasat gala myit rawt ai hpung ni hku nna 2019 ning May shata 4 ya shani hta dawsa laknak 150 jan hpe Israeli ni nga ai maga de gap bun ai hpe chye lu ai.

Ndai zawn Palestine hte Israel ni manghkang kalang bai byin wa ai gaw, May shata praw 3 ya bat hpang manga ya shani, Gaza jarit mayan hta Israel hpyen la lahkawng hpe sinat hte gap ngut ai hpang, Israel ni hku nna nbung li hte bai gap wa ai hta Gaza kaw nga ai Hamas hpung kaw nna marai lahkawng hte, Gaza jarit hta ninghkap nga ai Palestine shawa lahkawng, yawng rai jang marai 4 si hkrum nna, marai 51 hkala hkrum wa sai. Dai hpe kalang Palestine ni hku nna, kru ya shani hta Gaza kawn dawsa pila 150 hte matai htang ai hku n’na bai gap hpang wa sai.

Gaza kaw nna Rocket hte gap bun ai hpe lamu hta bai jahten kau sai

Gaza kawn dawsa laknak 150 daram gap wa ai hta, Israel makawp maga dap ni hku nna ( Iron Dome Missile ) hte 90 jan hpe lamu hta hkap shingdang jahten kau lu sai ngu tsun wa sai, Israeli maga de si hkala hkrum ai lam n nga shi ai hpe mung chye lu ai.

Rocket hkra ai majaw dum n’ta hten mat ai Dingda Israel na dum n’ta

Palestine shiga dap langai hku nna tsun ai hta, Israel hpyen gasat nbung li ni hku nna Beit Hanoun mare na hkai lu hkai sha galaw ai shara ni hpe shading nna gap ai ngu tsun wa sai.

Israel hpyen dap ni hku nna, dingda Gaza nhpan kum da ai Khan Younis mare a sinpraw maga na hpyen dap outpost ni hpe mung nbung li hte bai nhtang gap wa sai. Gaza hkam kaja lam dap a Salang kaba langai tsun ai hta, Palestinian masha 2 si nna marai 4 hkala hkrum wa sai ngu tsun wa sai.

May 3 ysa shani hta hkala hkrum ai Palestine Masha

Gaza hta machyu ai, gasat gala myit rawt ai hpung ni nga ai shara de sha, shading nna gap ai ngu Israel hpyen dap kawn tsun wa sai.

Gaza hta Palestine amyu sha wan 2 daram nga nna, Israel ni hku nna, mai gan kaw nna garum ai lam ni hpe Gaza de n shalai shangun n’na pat da ai majaw, Gaza bu ni hku nna sut masa lam hta mayak kaba hkrum wa nna, lam shagu hta matsan hkrum let hkam sha ra nga ai.

REF: BBC, Aljazeera
Ja Tawng Naw

LEAVE A REPLY

Please enter your comment!
Please enter your name here