Dingdung Korea Ningbaw Hte Hkrum Na Matu Lajang Nga Ai Hpe Donald Trump Tsun Shaga

Dingdung Korea Mung dan ningbaw Kim Jong-un hte kalang bai hkrumzup bawngban na matu shara lajang nga ai hpe, American Gumsan Magam Donald Trump hku nna 2018 ning January shata 6 ya shani hta tsun shaga ai hpe chye lu ai.

“ Dingdung Korea hte American mungdan yan a hku hkau kazawn mazum ai lam gaw, grai pri nem let kaja nga ai, ( Missile ) Lak nak pala pyen kaba hte jahkrit shama ai lam ni n’nga sai, kanawn mazum ai lam gaw kaja nga ai majaw, laga yak ai lam ni nga na n’re. Dingdung Korea ningbaw hte mung ading tawn nre ai hku ga shaga ngut sai, Ngai gumsan magam amu galaw hpang ai shaloi hta, Korea hte majan byin wa na masa rai taw ai, ya gaw lahkawng maga grai kaja ai hku rai wa sai, dai lam gaw grai kaja ai” ngu nna Donald Trump tsun wa sai.

Lai wa sai bat hta, Kim Jong-un kaw nna grai akyu rawng ai laika lagnai lu la ai lam hpe mung, Trump hku nna matut tsun wa sai, raitimung laika hta lawm ai kata lam hpe gaw grai n’tsun dan shi ai.

Kim Jong-un hku nna shaning ningnan na, Mungdan hpe mungga tsun ai shaloi, “American mungdan hku nna sut hpaga lam pant hkum da ai lam naw nga ai majaw, Nuclear lam hte seng nna, Dindung Korea mungdan gaw, masa lam galai ra na re, “ ngu tsun ngut ai hpang, Donald trump hpe laika langai sa dat ai hku re.

Dingdung Korea hte American mungdan yan gaw labau shang hku nna, 2018 ning June shata shaloi Singapore mungdan hta bawngban hpawng galaw lai wa sai. Dai zuhpawng hkrum ngut ai hpang, Nuclear laknak galaw ai lam ni hpe jahten kau na matu, Kim Jong-un hku nna ga sadi jaw wa sai hpe chye lu ai.

REF: VOA, BBC
Ja Tawng Naw

Leave a Reply

Your email address will not be published. Required fields are marked *