Chyeju Dum Ai Lam Hta Lawm Ra Ai Lam Hkungga Masum

0
265

American mungdan hta 2018 Nov 22 ya bat hpang mali ya shani ang ai Chyeju dum poi hpe galaw nga ai ten, Wunpawng mungdan hta mung chyeju dum poi ni hpe hkyen nga ai ten hta, chyeju dum poi hte seng ai mungga langai hpe ga gale nna n’gun jaw dat nngai.

Chyum laika kaw nna, chyeju dum ai lam  hte seng nna, shani shagu na a sak hkrung lam hta  Karai Kasang galawa ya ai  amu magam ni hpe dum shingran let chyeju dum ra ai  ngu matsun da nga ai. Dai ni anhte ni mung hkam la lu ai lam ni kaw nna Karai Kasang hpe chyeju dum hkungga hku nna sak jaw na hkyen nga ga ai, Dai hta Karai Kasang hpe  chyeju dum ai lam hta ndai lam masum hpe dum shingran let, hkung ga sak jaw ai hta nmai malap na re.

  • Galoi Mung kabu Gara Nga Ra ai                                                                                                                           ————————————–

Chyum laika ting hta, Rejoice ( kabu gara ) ai ngu ai hpe 14 lang mu lu ai.  I Htesaloni 5:16-18 hta yu ai shaloi, Kasa Pawlu hku nna, Htesaloni buga hpung masha ni hpe zingri zingrat hkrum ai shaloi, Karai Kasang hta kabu gara ngu lu na matu n’gun jaw da nga ai.

Kasa Pawlu  hku nna, buga hpung masha ni hpe, “ happiness “ ngu ai kabu pyaw hpa ngu ai ga si hku nna, n’tsun da nga ai, “ kabu pyaw hpa “ ngu ai gaw masa hta hkan nna, hkam sha ni myit hte seng nga ai, anhte a masa lam ni kaja, awng dang jang kabu ai, masa lam ni n’kaja ai nga jang myit htum ai, myit npyaw ai ngu ai masa lam hta hkan ai hpe tsun mayu ai.

Ya kasa Pawlu tsun ai “Joy” kabu gara ai lam gaw, kam sham ai lam hte matut manoi nna byin wa ai hpe tsun ai, Habakkuk 3:19 hta, tsun da ai hte maren, Karai Kasang kaw shingbyin nna lu ai, kabu gara  ra ai lam hpe tsun nga ai. 

  • Matut Manoi Kyu Hpyi Na lam                                                                                                                               ———————————–

Kasa Pawlu hku nna, Htesaloni  buga hpung masha ni hpe, matut manoi kyu hpyi nga na matu n’gun jaw da ai, Kasa Pawlu hku nna, ndai hpe aja awa jahkring hkring tsun ai gaw, kyu hpyi ai gaw Karai Kasang kaw nna, matut manoi lu mai ai sau n’gun kaba hte bung nna,  yak hkak hkrum ai lam hta , kabu gara hkam jam lu na lam kaba langai ngu tsun shaleng da ai.

Shinggyim masha gaw, anhte hpyi ai mahtai n’lu jang, na jang akyu hpyi ai lam hpe matut  manoi nkam hpyi wa sai. Daniela 10:12 hta Daniel akyu shawng hpyi ai shani kaw nna nan karai Kasang na ya sai ngu lawm nga ai, Karai Kasang masat da ai aten du jang, Karai Kasang anhte hpe htap htuk ai mahtai jaw na re. Dai majaw Karai Kasang hpe chyeju dum ai lam hta mung, ndai matut manoi kyu hpyi ai lam mung ahkyat ai hku lawm nga ai.

  • Chyeju Dum Chye u                                                                                                                                                  ————————

Mabyin masa ma hkra hta Karai Kasang hpe chyeju dum chye na ahkyak nga ai. Yawba hta sutgan yawng ma mat tim, Karai Kasang hpe chyeju dum nga ai, Madu Yesu masha 5000  hpe muk jaw sha hkyen ai shaloi, Karai Kasang hpe Chyeju shawng dum ai, Kasa Pawlu hte Sila yan mung Philippi htawng kata kaw nna Karai Kasang hpe chyeju dum ai.

Mabyin masa lam yawng hta chyeju chye dum nga jang Philippians 4:7 hta lawm ai hte maren, Karai Kasang kaw nna ngwi pyaw ai lam gaw, an hte myit mang ai hpe, Madu Yesu hta e bau sin, hkam la lu na re.

Dai majaw Karai Kasang hpe chyeju dum hkungga hkyen nga ai ten hta, ndai hkungga masum: kabu gara nga ra ai lam, matut manoi kyu hpyi na lam hte, chyeju dum chye ai lam ni lawm hkra lajang let, Karai Kasang chyeju dum sak jaw wa ga.

REF: The Virtual Preacher

Ja Tawng Naw

 

LEAVE A REPLY

Please enter your comment!
Please enter your name here