Canada Mungdan Masha langai Hpe Miwa Tara Rung Kawn Si Dam Ari Jahkrat

0
55

Nanghpam tsi dut ai lam hte Canada mungdan masha langai hpe, 2019 January shata praw 14 ya shani hta Miwa tara rung kaw nna si dam ari galai chyahkrat ai hpe chye lu ai.

Canada mungdan masha Robert Lloyd Schellenberg gaw 2014 ning shaloi Miwa mungdan de nanghpam tsi Metafimine 225 KG hpe tara nshang ai hku nna mayun hpaga ga ai majaw, rim hkurm nna tara jeyang wa ai shaloi, 2018 ning November shata hta htawng dam 15 ning jahkrat hkrum sai. Dai 15 ning htawng dam hpe ayu hkam hpyi lajin ai shaloi, Miwa mung a Sinpraw Dingdung na, Daliyan tara rung kawn, htawng dam 15 ning gaw grai n’law ai nga nna, January shata praw 14 ya shani hta si dam de galai jahkrat dat ai.

Daliyan Tara Rung

Dai lam hte seng nna Canada hkringmang daju Justin Turdeau hku nna gaw, “ Ndai zawn si dam de galai jahkrat ai hpe an hte hku nna grai tsang ai, Si dam ari hpe kam ai hku jai lang nga ai,” ngu tsun da nga ai.

Miwa mung a Huawei company Sut hpaga dap lithkam, Huawei Company madu a kasha majing rai nna, American ni ra sharawng nga ai Meng Wanzhou hpe Canada mungdan ni hku nna 2018 ning December shata praw 1 ya shani hta rim ya ai majaw, Miwa hte Canada a lapran kanawn mazum ai lam hta shagyeng hkat ai lam ni byin wa sai.

Miwa Asuya ni hku nna, Canada sumtsan salang hkring sa sai Michael Kovrig hte Canada hpaga la Michael Spavor yen hte rau kaga Canada mugdan masha yawng marai 13 hpe Miwa mung a shim lam hpe hkra machyi hkra galaw ai ngu nna 2018 ning December shata 12 ya shani kaw nna, rim da let san jep ai lam ni galaw nga ai.

Rim da hkrum ai Michael Kovrig

Huawei company a majaw, rim da ai ni hpe ari shajat nna jaw ai ngu mara shagun da ai lam hpe, Miwa Asuya hku nna hkum shara da nga ai hpe chye lu ai.

REF: BBC, VOA, CTV
Ja Tawng Naw

LEAVE A REPLY

Please enter your comment!
Please enter your name here