American Mungdan Jarik Lai Shang Na Shakut Ai Ni Hpe Myiprwi Bawm Hte Kapaw Pat Hkum

Lai wa sai  bat masum daram kaw nna, America de bu htawt  shang na matu hkyen nga ai masha wuhpung 6000 daram gaw, American lamu ga jarik hta du wa nna, USA maga de na San Diego mare hte, Mexico magade na Tijuana mare lapran hta nga ai, San Ysidro jarik rap gate hpe lai nna USA de shang hkyen wa ai majaw,  lit nga ai ni hku nna pat kau ai shi ga na lu ai.

Num, La, ma kaji yawng 500 daram lawm ai wuhpung gaw, jarik hpe rap nna USA maga de shang na hkyen nga ai lam hpe, Mexico balik ni n’lu pat shingdang ai majaw, USA jarik sin hpyen hpung ni hku nna, myiprwi bawm kapaw nna pat hkum ai lam hpe galaw ai.

Matut nna, bu htawt sit wa ai masha ni hte seng nna, dai lam hte seng nna, USA gumsan magam Donald Trump gaw, Hpyen n’gun kaba lang nna, pat hkum na matu matsun da ai.  Mani na laban jahpawt hta, Mexico mungdan hpe, bu htawt sit wa ai masha ni hpe pat hkum ya na matu Trump hku nna garum hpyi da ai lam hpe chye lu ai.

Trump hku nna, Bu htawt sit wa ai ni a mungdan shang na shawk shawn form hpe, masha htawt shang ai rung ( Immigration )  kaw nna  dawdan ai lam ngut hkra n’lu galaw shi laman, Mexico mungdan hta jahkring gan nga na hpe Mexico mungdan gaw, myit hkrum sai ngu ai lam hpe Trump tsun da ai gaw, n’teng ai ngu ai hpe Mexico asuya ni tsun nga ai.

Dai majaw, masha 500 jan gaw, jarik hpe rap nna shang wan a hkyen ai hta, USA hpyen hpung ni myiprwi bawm hte gap nna pat shing dan ai lam galaw ai hpe chye lu ai.

 

REF: VOA News

Ja Tawng Naw

Leave a Reply

Your email address will not be published. Required fields are marked *