Akyu Kaba Lu Nga Ai Rohingya Rawt Malan Masa
2018 Nov 15 ya hta, myit hkrum da ai hte maren, Rohingya ni Myen mung de bai n’htang wa na lam hta, lit nga ai Myen Asuya salang ni wa hkap tau nga tim, Rohingya tsinyam ni Myen mung de bai n’htang wa na lam hpe gang jahking ai hpe chye lu ai. Rohinga ni sum ai kun, dang ai kun hpe gaw masa lam ni maram yu ga.
ARSA Rawt Malan N’gun
ARSA rawt malan hpung a masha hte laknak n’gun gaw grai re ai ngu na gaw n’mai tsun nga ai. ARSA hpung ni hpe yu jang, laknak madang kaja ai ngu nmai tsun tim, mungkan hta dan dawng hkra nan lu galaw ai hpe mu lu nga ai . 2017 ning na Rohingya rawt malan (ARSA) hpung ni, Rahkaing Mungdaw jarik mayan hta, Myen balik dap hte Myen hpyen dap post nkau mi hpe masha n’gun hte htim gasat ai kaw nna, Rohingya manghkang gaw mungkan hta mying dan dawng mat wa sai.
Yak Ai Kaw N’na Akyu kaba
Dai lam hpe, Myen mung dinghku dap ( balik hte hpyen dap ) ni woi awn nna mazut ai ladat hte, bai hparan wa ai hta, Rohingya myu sha ni marai sen 7 jan gaw, Bangladesh mung dan de hprawng yen mat sai. Hprawng yen ra tim, Rohingya ni mahtang amyat pru ai hpe mu lu ai:
– UN hte mungkan mungdan law law shan hte maga tsap nna shaga ya ai
– Mungkan hta roi rip hkrum dik htum myu sha ni ngu masat hkrum ai hte mungkan masha law law ai tsaw ra matsan dum ai lam hpe hkam la lu ai
– Myen mung hta hkam la na, grai yak ai mungchying masat hpe, Myen mung hku madang langai du hka, masat ya ra ai de du wa hkra lajang wa lu ai.
– Myen hpyen du ni hpe ICC de ahkyak la lu hkra hte, Myen mung Asuya hpe jam chya hkra lu galaw ai.
– Mungkan hta democracy masat masa ( icon ) hku shagrau hkrum ai Aung San Suu Kyi a shingna hpe nhtang hku byin wa shangun ai.
Lang Ai Ladat
Hpyen n’gun mi n’law tim, Rohingya ni shanhte hku nna madung lobby ( n’gung gang zinlu ai) hte media hpe tang du hkra lang mat wa ai.
– OIC ngu ai Islam nawku htung hpe hkap la ai mungdan ni yawng tsap nna, garum ai hte laga mungdan ni hkap la wa hkra lobby kaba lu galaw ai.
– Media hpe mungkan madang de jahkring hkring du hkra lu lajang ai.
Byin nga ai masa n’bung tim, Rohingya ni lang ai ladat hpe yu nna, Wunpawng amyu sha ni a rawt malan masa hpe atsawm dinglik yu nna, ra ai hta n’gun jat let, amyu sha yawng, madi shadaw shang lawm, galaw sa wa ga, ngu tang madun n’gun jaw n’ngai.
REF: RFA, BBC news
Ja Tawng Naw
