5G Huawei Ganghkau Matut Mahkai Jak Lang Na Matu Austria hte New Zealand Ni Pat Shingdang
Miwa mung kawn galaw shapraw ai, Huawei company a jak arai ni hpe nlang ai mungdan ni hta, New Zealand mungdan mung lawm wa sai hpe chye lu ai.
Huawei company kaw nna phone hte laga arai ni hpe lang na rai jang, Mungdan a shinlam hpe hkra wa mai ai ngu New Zeland mungdan tsun ai.
New Zealand mungdan hkanghkau matut mahkai ai company langai gaw, Huawei company a 5G matut mahkai mai ai dum n’ta hpe gap ai hta, Huawei a jak arung arai ni hpe lang mayu ai hku re. Rai ti mung, mung dan Asuya a ahkyak makoi magap da ai lam ni hpe sagawn la mat mai ai majaw, tsang hpa re ngu nna tsun shaga nga ai.
Laga mungdan ni mung, Miwa ganghkau matut mahkai ai company gaw, mung dang a shimlam hte seng ai lam ni hpe tawt lai lu ai ladat nga ai ngu mara tam da nga ai.
Laga mung dan ni madung hkrit tsang nga ai lam ni gaw, Huawei company hku nna, madu mungdan ni a sut hpaga yamga hte seng ai shim lam shiga ni hpe Miwa Asuya de shalai jaw nga ai ngu, ntsen ai lam ni re.
Dai majaw, Miwa mung a Huawei hte ZTE Company ni kaw nna galaw shapraw ai jak rai ni hpe lang na rai jang, shim lam shiga ni hpe mai la mat ai ngu Maigan mungdan ni myit tsang nga ai majaw, nlang na matu shada shadut hpaji jaw hkat nga ma ai.
REF: Reuters
Ja Tawng Naw
