59 Lang Na Mungshawa Shanglawt Rawt Malan Masat Ninghtoi Mungga

0
41

2019 ning, February shata ( 5) ya, ( 59) lang na mungshawa shanglawt rawt malan masat ninghtoi hta Wunpawng Mungdan Shanglawt hpung ginjaw komiti Tingnyang up Du Daju Jum Nban La kaw nna mungchying sha ni hpang de shana shabra dat ai rawt malan mungga hta na, nkau mi hpe tang madun dat ai.

( Hkumtsup ai mungga hpe, mai sau pa hta mara da ya sai )


● Hkawp, Mungshawa ni muit rum share ni e, hpyen gumshem asuya uphkang ai prat hta gaw, saboi ntsa kaw mungmasa ladat hte bawngban hpyi shawn nna shanglawt n mail u ai. Gasat gap di la ra ai. Gasat gap di la ga nga jang, masha ninggun law ra ai, sinnat laknak grung ra ai, ja gumhrpaw law law ra ai…..


● Lahta de madi madun da ai lawnglam ni hpe sung sung li li myit dinglik yu nhtawm anhte Wunpawng amyu sha ni myit shadik hkap la mai na jet ai Federal Democracy munghpawm gaw gap sa wag a ngu myit ningchyan shaw let, tinang a ginra kaw na pru hkawm nhtawm kaga hpu-anu laknak lang rawt malan hpung yawng hpe kahkyin gumdin let, lata gindun jawm galaw sa wa nga sai re..

● “ Jinghpaw” ngu ai shingteng amying gaw ginru ginsa labau hku shamying hkrat wa ai rai nga ai, Amhyu lakung langai mi hpe tsun ai nre, yawng hpe gumphawn nna tsun ai re. Karai Kasang a Mungga hpe hkap la kamsham nna, laika bai lu la ai hpang, Hkahku, Duleng, Mungnawk, Htingnai, Gara, Gauri, Mungmyit Sinli ni mi moi tsun shaga ai ga loi li shai hkat ai kaw na aga langai sha byin nna tsun shaga lang wa ai majaw Jinghpaw amyu madung zawn byin mat ai hpe mu lu nga ai.


● Ninggawn Mungmasa laika buk hta Wunpawng amyu ngu, yawng hpe hkyawm ai hku tsun shamying ai lam rai nga ai. Jinghpaw Wunpawng ngu ai hpe anhte amyu lakung bawsang wuhpung wuhpawng kata tsun shamying la ai shingteng amying rai nga ai hpe mung myit dum chye na ra ai. Kachin ngu ai shingteng amying gaw, maigan amyu ni shamying da ai rai nga ai. Maigan amyu ni maigan mungdan ni hte hkurm shaga wa ai shaloi gaw Kachin amyu ngu tsun shaga ra ai. Ndai lam gaw kadai mung nyet kau n lu ai lam re. Maigan mungdan ni yawng mung dai hku jai lang tsun shaga nga ai hpe mu lu nga ai.

● Dai majaw, Wunpawng amyu ngu ai shingteng amying kata anhte myit hkrum myit ra let, lu ging lu ang ai ahka ahkang, shadip jahpang lu la hkra Wunpawng Mungdan Shawnglawt Hpung Ginjaw Komiti a woi awn ai lm kaw lahkrip ra ra hkan nang hkan sa nga ga law.

● Dai ni anhte jawm lang nga ai Jinghpaw laika gaw Mungkan hta tara shang ai laika rai nga sai. Raitim hkum tsup ai lam garai n nga ai. Ndai laika hpe amyu bawsang yawng mai hti mai ka lang na matu machyoi hpaji chye ai masha lata san la nhtawm ka lajang jinghkum la na hpe she myit ga. Kaga laksan n myit shapraw ra ai. Bawsang shagu kaw na laika ga-si, ga-ngau ni shaw la nna ka lajang jinghkum la yawng bawsang yawng hti mai ka lang ai Jinghpaw laika byin wa na hpe myit mada ai re.

● Roi rip dip sha hkrum nga ai rudi amyusha ni yawng myit hkrum mangrum let, rap ra ai tara hte tara rap ra ai kata, ngwi pyaw simsa ai hte jet ai Federal Democracy Munghpawm gaw gap sa wa lu u ga.


REF: Shawng Lam shi sawk
Ja Tawng Naw

LEAVE A REPLY

Please enter your comment!
Please enter your name here