2008 Ning Gawda Ai Tara Hpe Gram Lajang Pawng Hpawm Komiti Hpe Shagrin

0
53

2019 ning February shata 6 ya hta, Naypyidaw Munghpawm rapdaw zuphpawng hta, 2008 ning gawda ai tara hpe lawan ai hku gram lajang sa wa na hta, pawng hpawm komiti hpaw na hte seng nna, Magway ginwang kaba a dat kasa U Awng Kyi tang shaw ai ra ahkyak makyen hpe, ra lata mae jaw nna shagrin dat sai hpe chye lu ai.

Tang madun wa ai mahkyen hpe Gram lajang na hte seng nna, amat 30 daram hkut hkut nai nai htai lai tsun shaga ngut ai hpang, Munghpawm rapdaw ningtau hpa-awn U Tun Tun Hein hku nna, malawng maga madi shadaw hkap ai lam hku tsun shaga ai majaw, tang madun ai mahkyen hpe shagrin mai ai hpe tsun wa sai.

Munghpawm rapdaw Hpa-awn Duwa T Hkun Myat hku nna, ra lata mae jaw na matu lajang sai. Ra lata mae jaw mai ai marai 621 kaw nna, madi shadaw ai marai 414, ninghkap ai marai 191, lapran tsap ai marai 6 hku nna jaw wa sai, dai majaw, malawng maga madi shadaw sai majaw, 2008 gawda ai tara gram lajang pawng hpawm komiti hpe hpaw sa wa na matu shagrin da sai.

Matut nna, Munghpawm rapdaw hpa-awn hku nna, komiti hta rap daw lahkawng kaw nna dat kasa ni, parti shagu na hte, hpyen dap dat kasa ni hkum hkum ra ra lawm nna, htp htuk ai aten hta saw shaga let lajang wa na hpe tsun wa sai.

Munghpawm rapdaw hta, NLD party ni 59%, amyu bawsang party ni gaw 11%, USDP ni gaw 5% hte Myen hpyen dap ni gaw 25% hte shang lawm nga ai hpe chye lu ai.

NLD praty ni hku nna Mungdan hpe woi awn ai 3 ning jan wa jang she 2008 ning gawda ai tara hpe rapdaw kata hku nna gram lajang hpang wa ai hpe mu mada lu nga ai, kaja wa lu gram na nlu gram na hpe gaw, mungdan masha ni myit shang sha ai lam kaba rai wa nga sai.

REF: Munghpawm rapdaw shiga
Ja Tawng Naw

LEAVE A REPLY

Please enter your comment!
Please enter your name here