1994 Ning KIO Gap Hkat Jahkring Ai Hte Seng Nna Duwa Wabaw Zau Rip A Ningmu

0
44

(1994) ning na gap hkat jahkring ga sadi lakmat htu ai hte seng nna, Du Wa Wabaw Zau Rip, Shanglawt Du Salang ni hpe San ai Ga San n kau mi hpe Myu wunpawng sha ni bai dum shingran n’gun la lu na matu tang madun dat ai.
San: Du Wa Wabaw Zau Rip ( Kachin State Minister 1958 – 1959 )
Htai: Ningbaw Kaba Malizup Zau Mai

“Ya Shanglawt ni hte seng nna mi 1994 ning, febuary shata 24 ya hta gap hkat jahkring ai, n gap hkat na matu, gap hkat jahkring ga sadi lakmat htu sai”.
“Ga sadi lakmat htu ngut sai, shing rai nna, dai ni gaw n gap hkat ai, n gasat ai. Jinghpaw hte myen ni n gasat sai. N gasat ai nga nna gaw, Mung kade pyaw wa sata? nga yang anhte myit mada ai daram n pyaw ai. Myit mada ai gaw madu uphkang aya, mung masa hku tsun ga nga yang, madu uphkang aya nlu dingsa gaw anhte nlu pyaw ai. Anhte kadai mung n pyaw ai. Lachyum gaw hpa baw byin wa a ta? Nga yang gaw, n gap hkat yang she myen ni gaw shanhte ra ai hku hkrai galaw, anhte jinghpaw ni gaw ra ai hku hpa n mai galaw, re ai baw n dai n gap hkat ai ndai gap hkat jahkring ga sadi lakmat gaw ndai hku byin taw nga ai”.

Dai rai nna ngai shanglawt ningbaw ni hpe, Ningbaw Kaba Malizup Zau Mai hpe ngai hkrum sai. Hkrum nna ngai shanhte hpe san ai. “Ya nanhte shaning (30) ning jan gasat ai, hpa majaw gasat ai? Madu uphkang aya lu na matu gasat ai nga ai n re i? ya dai ni nanhte n gap hkat ai, nanhte madu uphkang aya lu sai i? ngu nna ngai hkap san sai. Kanang? Nanhte tsun ai madu uphkang aya kanang lu sata ya? Ya mung madu uphkang aya nlu ai sha hpa rai gap hkat jahkring a ta? Nanhte gap hkat jahkring na rai yang nanhte a ningbaw kaba wa Brang seng mung ngai hpe n dawng ai”. Du Kaba Zau Mai gaw nye kahkri wa rai nga ai. “Nang ngai hkri wa mung ngai Ning-Tsa Ba hpe hpa rai ndawng ai?” ngu nna ngai shanhte hpe hkap dara sai. Hkap deng ai shaloi shanhte hpa tsun a ta? Nga yang?


“Nang hpe alaga jamjau n jahkrum mayu ai majaw da”! Ngai hpe shanhte jamjau n jahkrum mayu ai lachyum gaw;- (ga shadawn le;- Ngai hpe myen ni rim nna hkyuk de bang na nga ai lachyum rai nga malu ai). Hpa rai nna ngai hpe n bawng ai ta? Bawng ai nga tim makoi magap hku nna bawng ai she re ngu sai. Myen ni kadai chye na n re. Dai raitim shanhte n bawng ai. Dai rai nna shanhte a ningbaw kaba Maran Brang Seng wa gaw;- shi galaw ai lam shi shut dum nna rai kun? N chye sai i? shi gaw baw nu de sai shang nna n sa hti mat wa sai. Dai rai nna nsa hti mat wa jang she Zau Mai wa gaw mi gaw shanhte a hpyen du kaba wa rai nga ai. Zau Mai wa hpe ningbaw malai bai tang ai rai nna she, Zau Mai wa she gap hkat jahkring lakmat sa htu ai rai nga ai.


Dai shaloi ngai shanhte hpe san ai; – A taw? Nanhte madu uphkang aya a matu she shaning (30) ning gasat ai rai yang dai ni madu uphkang aya mung nlu hpa rai nna gap hkat jahkring ai? Ngai shanhte hpe tsun ai rai yang, shanhte gaw ngai hpe hpa nchye htan sai. Shanhte htan na matu grai yak sai.

Dai rai nna ngai tsun ai gaw nanhte (30) ning jan nanhte gasat ai majaw, anhte jinghpaw mung e myen hpyen dap (30) jan du taw nga ai. Dai rai nna nanhte hte anhte gasat n ra sai re majaw nanhte myen hpyen dap ka-ang hkup dawm la mu i? ngu nna mung ngai gaw tsun sai. Raitim mung dai ni du hkra myen ni hpa ga mung n shaga ai. Rai nna nanhte mungmasa lam gaw galoi tsun na galoi jahta na ngu nna mung ngai san sai. “Mung masa jahta na matu gaw, anhte minority mayen maga ni Sam, Hkang, Mon, Rahkai, Kayin, Kaya ni yawng myit grai n hkrum ai da. Kayin Bu Mya wa gaw grau nna baw ja nga ai da! Dai wa mung myit nhkrum nga ai da. Dai rai nna shanhte rau jahta na matu gaw anhte nsen langai sha, ga langai sha rai na na matu shanhte shawn tawn ai gaw Trible Type Conferee ngu ai Hpung masum hkrum na matu, (1) Na-Wa-Ta Asuya (2) NLD Party (3) Anhte minority group, trible type conference galaw ga ngu ai hku rai nga ai. Myen ni mung n hkap la ai. Dai zuphpawng galaw lu yang gaw anhte myen mungdan a ngwi pyaw simsa lam, anhte bum nga masha monority a ahkaw ahkang ni yawng dai kaw anhte jahta na hku rai nga ai. Dai garai n mai byin ai” nga tsun ai.

Dai majaw ngai shanhte hpe tsun ai, ya nanhte gap hkat jahkring galaw ai gaw (4) ning rai wa sai. (4) ning laman nanhte hpa galaw nga ai? Ngai hpe tsun dan rit. Maning moi ning hkan nanhte hpa baw galaw lai wa ai, hpa baw awng dang ai i? Ngai hpe tsun dan marit. Dai kaw na shawng de hpa galaw na ngu ai lamang ni ngai hpe tang madun marit ngu nna ngai shanhte hpe tsun dan ai. Dai rai nna ya du hkra gaw ngai hpe mahtai n jaw lu ma ai. Shanhte ngai hpe hpa mung n tang dan lu ma ai”.

Shanhte tsun dan na mahtai la let,
Dai ni na ten hta Du wa Wabaw Zau Rip mung n nga mat sai.

Du wa Wabaw Zau Rip a ga san ni hpe bai myit yu na matu, Du wa a interviews galaw ai Vedio clip langai kaw na hpaji la na matu ka lajang dat ai law.

REF: John Sinpraw

Ja Tawng Naw

LEAVE A REPLY

Please enter your comment!
Please enter your name here